ក្រុងមែសៃៈ ក្រុមអ្នកជួយសង្រ្គោះ ដែលទាញយកក្រុមបាល់ទាត់ថៃពីក្នុងរូងភ្នំដែលលិចទឹក បានធ្វើការរុះរើកន្លែងធ្វើការរបស់ពួកគេ កាលពីថ្ងៃព្រហស្បតិ៍ខណៈមានគម្រោងប្រែក្លាយទីកន្លែងនោះឲ្យទៅជាសារមន្ទីរមួយ ដើម្បីធ្វើជាភ័ស្តុតាងបង្ហាញពីកិច្ចប្រតិបត្តិការយ៉ាងក្លាហាន។
យ៉ាងហោចណាស់មានក្រុមហ៊ុនផលិតខ្សែភាពយន្តមួយកំពុងធ្វើគម្រោងមួយ ដើម្បីផលិតខ្សែភាពយន្តហូលីវូដអំពីវីរភាពដ៏អង់អាចរបស់ក្រុមអ្នកមុជទឹក អ្នកស្រាវជ្រាវក្នុងរូងភ្នំ និងក្រុមគ្រូពេទ្យ ដែលប្រថុយនឹងគ្រោះថ្នាក់ ដើម្បីរំដោះក្មេងក្រុមបាល់ទាត់ «Wild Boars» ចេញពីរូងភ្នំ។
រូបភាពវីដេអូ នៃការជួយសង្គ្រោះប្រកបដោយភាពអង់អាចក្លាហាន ត្រូវចេញផ្សាយកាលពីថ្ងៃពុធ ដោយបានបង្ហាញឲ្យឃើញក្មេងជំទង់មានអាយុពី ១១ ឆ្នាំដល់ ១៦ ឆ្នាំ ត្រូវដាក់ក្នុងស្នែង សែងទៅរកកន្លែងសុវត្ថិភាព។
ក្រុមក្មេងទាំងនោះ ត្រូវបានគេឃើញអង្គុយនៅលើគ្រែរបស់ពួកគេ នៅក្នុងមន្ទីរពេទ្យ ជាទីដែលពួកគេត្រូវបានដាក់ឲ្យនៅដាច់ដោយឡែក រហូតដល់ក្រុមគ្រូពេទ្យបញ្ជាក់ថា ពួកគេមិនមានឆ្លងជំងឺអីទេនៅក្នុងអំឡុងជាង ២ សប្តាហ៍នៅក្នុងទីងងឹតនោះ៕