.jpg)
ប៉ូលិសមកជួយប្រមូលនិងសម្អាតកម្ទេចកម្ទីថ្មដែលនៅរប៉ាត់រប៉ាយពេញលើផ្លូវនៅក្នុងតំបន់មួយលិចលង់ដោយទឹកជំនន់នៅក្រុងគុម៉ាណូ។ AFP
ក្រុងគុម៉ាណូៈ ក្រុមសាច់ញាតិដែលអស់សង្ឃឹម បានទទួលព័ត៌មានដ៏អាក្រក់នៅ ថ្ងៃចន្ទ ខណៈដែលក្រុមជួយសង្រ្គោះ បានជីកកកាយរកមនុស្សបាត់ខ្លួននៅក្នុងដីបាក់ ក្រោយពីទឹកជំនន់ដ៏ខ្លាំងក្លា ដែលបណ្តាលឲ្យមនុស្សប្រមាណ ១០០ នាក់ស្លាប់ នៅភាគកណ្តាល និងភាគខាងលិចនៃប្រទេសជប៉ុនត្រូវលិចទឹកទាំងស្រុង។
ខណៈទឹកបានស្រកទៅវិញ ក្រុមអ្នកធ្វើការងារសង្គ្រោះបន្ទាន់ អាចទៅដល់កន្លែងដែលត្រូវបានកាត់ផ្តាច់ជាទីដែលក្រុមអាជ្ញាធរ និយាយថា ពួកគេអាច រកឃើញសាកសពបន្ថែមទៀតនៅក្នុងបំណែកផ្ទះបាក់បែក ដែលត្រូវបំផ្លាញដោយភក់ និងកម្ទេចថ្ម។
ក្រុមអ្នកជួយសង្រ្គោះ បាននិយាយថា នៅមានលទ្ធភាពរកឃើញអ្នកដែលនៅរស់ ប៉ុន្តែបានទទួលស្គាល់ថា មានសង្ឃឹមតិចតួច។
ទាហានម្នាក់ នៅកន្លែងកើតហេតុនោះ បានប្រាប់ AFP ថា វាមានរយៈពេល ៣ ថ្ងៃហើយ ប៉ុន្តែនៅមានលទ្ធភាព អាចរកឃើញអ្នកនៅរស់ថែមទៀត។
កាលពីចុងសប្តាហ៍មុន ទឹកភ្លៀង បានធ្វើឲ្យទឹកទន្លេឡើងជាង ១ ម៉ែត្រ បណ្តាលឲ្យច្រាំងទន្លេបាក់ ជន់លិចលង់ភូមិជាច្រើន ហើយបង្ខំឲ្យប្រជាជនឡើងលើដំបូលផ្ទះដើម្បីរង់ចាំការជម្លៀសដោយឧទ្ធម្ភាគចក្រ។
ទិដ្ឋភាពទូទៅនៃផ្ទះរាប់សិបខ្នងត្រូវលិចទឹកជំនន់នៅក្នុងក្រុង Kurashiki នៃខេត្ តOkayama កាលពីថ្ងៃទី៨ខែកក្កដា ឆ្នាំ ២០១៨។ AFP
ជើងភ្នំជាច្រើនត្រូវទឹកលិចហើយបាក់ដីបានបណ្តាលឲ្យផ្ទះឈើជាច្រើនខ្នង ដួលរលំនិងផ្លូវថ្នល់ជាច្រើនបាក់ស្រុតខូចទាំងស្រុង។
រដ្ឋាភិបាល បានថ្លែងថាមនុស្សយ៉ាងតិច ១០០ នាក់បានស្លាប់ និងជាច្រើននាក់ទៀតនៅបាត់ខ្លួន ហើយចំនួន អ្នកស្លាប់ ត្រូវបានរំពឹងទុកថានឹងកើនឡើងថែមទៀត។
អ្នកនាំពាក្យរបស់រដ្ឋាភិបាល លោក Yoshihide Suga បានថ្លែងថា ប៉ូលិស ៧៣០០០ នាក់ក្រុមអ្នកពន្លត់អគ្គិភ័យ និងទាហាន បានចូលរួមក្នុងកិច្ចខិតខំប្រឹងប្រែងជួយសង្រ្គោះនេះ ដោយឧទ្ធម្ភាគចក្រ ៧០០ គ្រឿង ត្រូវបានដាក់ពង្រាយដើម្បីជួយ៕
