.jpg)
លោក ប្រាយុធ ចាន់-អូចា ថ្លែងក្រោយពីពិធីតែងតាំងលោកជានាយករដ្ឋមន្ត្រី។ AFP
ក្រុងបាងកកៈ អនុប្រធានមេដឹកនាំបក្សប្រជាធិបតេយ្យ លោក នីបផន-ប៊ូននីយ៉ាម៉ាន់នី បានថ្លែងកាលពី ថ្ងៃពុធថា គណបក្សរបស់លោក បានទទួលការអះអាងពីលោកនាយករដ្ឋមន្ត្រី ប្រាយុធ ចាន់-អូចា ថា ពួកគេនឹងទទួលបានតំណែងរដ្ឋមន្ត្រី ៨ ដែលពួកគេបានស្នើសុំ។
លោក នីបផន បានបញ្ជាក់អះអាងក្រោយពីលោកឧត្តមសេនីយ៍ ប្រាយុធ ចាន់-អូចា បានបង្ហាញឲ្យឃើញថា លោកបានចាប់ផ្តើមពិភាក្សាជាមួយដៃគូក្រុមចម្រុះ ជុំវិញការបែងចែកតំណែងនៅក្នុងគណៈរដ្ឋមន្ត្រី។
លោកឧត្តមសេនីយ៍ ប្រាយុធ ចាន់-អូចា បានថ្លែងថា រដ្ឋាភិបាលថ្មីនឹងត្រូវបានបង្កើតក្នុងពេលឆាប់ៗខាងមុខនេះ ដោយបានបន្ថែមថា ចំណែកលោកមានសិទ្ធិសម្រេចថា តើនរណា នឹងបានត្រូវដាក់បញ្ចូលនៅក្នុងជួរគណៈរដ្ឋមន្ត្រី ហើយលោក ប្រាយុធ ចាន់-អូចា ត្រូវតែពិគ្រោះយោបល់ជាមួយក្រុមដៃគូចម្រុះទាំងនោះ។
លោក ប្រាយុធ ចាន់-អូចា បានថ្លែងថា៖ «ខ្ញុំមិនអាចធ្វើការសម្រេចចិត្តជាឯកតោភាគីដូចកាលពីមុនបានទេ។ ខ្ញុំមិនអាចធ្វើមិនដឹងមិនឮជាមួយពួកគេទៀតនោះទេ (ក្រុមដៃគូចម្រុះ)។ ប្រសិនបើយើងមិនសហការគ្នានោះ យើងមិនអាចដំណើរការទៅមុខបានរលូនទេ» ដោយបានបន្ថែមថា ក្រុមរដ្ឋមន្ត្រីទាំងនោះ ភាគច្រើនត្រូវបានជ្រើសរើសចេញពីសមាជិកសភាជាប់ឆ្នោត។
ទោះបីជាយ៉ាងណាក៏ដោយ ក៏លោកឧត្តមសេនីយ៍ ប្រាយុធ បានរក្សាភាពស្ងៀមស្ងាត់អំពីថា តើលោកនឹងកាន់តំណែងរដ្ឋមន្ត្រីការពារជាតិ ដែរឬយ៉ាងណា? BKP/SK
