ក្រុងឡុងដ៍ៈ លោកនាយករដ្ឋមន្ត្រីអង់គ្លេស បូរីស ចនសុន ឡើងកាន់តំណែងកាលពីថ្ងៃពុធដោយប្រឈមនឹងបញ្ហាជាច្រើន ចាប់ពីការដោះស្រាយការចាកចេញពីសហភាពអឺរ៉ុប (Brexit) ស្របពេលមានភាពប្រាកដប្រជាដែលកំពុងកើនឡើង រហូតដល់ការដោះស្រាយវិបត្តិនយោបាយភូមិសាស្ត្រជាមួយអ៊ីរ៉ង់។
បញ្ហាចម្បងៗដែលមេដឹកនាំអង់គ្លេសថ្មីប្រឈម ខណៈលោកចូលទៅវិមាន Downing Street មានដូចតទៅ៖
-Brexit: ការចាកចេញពីសហភាពអឺរ៉ុប ដែលជាប់គាំងរបស់អង់គ្លេស បានបង្ខំឲ្យអ្នកកាន់តំណែងមុនរបស់លោក ចនសុន គឺលោកស្រី ថេរ៉េសា ម៉េ ចុះពីតំណែង គឺជាបញ្ហាបន្ទាន់បំផុតដែលលោក ចនសុន ប្រឈមនៅថ្ងៃទី១។
លោកបានប្តេជ្ញាធ្វើការចរចាជាថ្មីអំពីកិច្ចព្រមព្រៀងចាកចេញពីសហភាពអឺរ៉ុប ដែលលោកស្រី ម៉េ សម្រេចបានជាមួយក្រុងប្រ៊ុចសែលនោះ។
-ការគាំទ្រពីសភា: គណបក្សអភិរក្សរបស់លោក ចនសុន មិនមានសំឡេងភាគច្រើនដាច់ខាតនៅក្នុងសភា និងពឹងផ្អែកលើការរៀបចំជាមួយបក្សសមាជិកសហជីពប្រជាធិបតេយ្យរបស់អៀរឡង់ខាងជើង (DUP) ដើម្បីអនុម័តច្បាប់ និងរក្សាកាន់តំណែង។
-វិបត្តិអ៊ីរ៉ង់ៈ លោក បូរីស ចនសុន ឡើងកាន់តំណែងខណៈទំនាក់ទំនងជាមួយប្រទេស អ៊ីរ៉ង់ ស្ថិតក្នុងស្ថានភាពតានតឹងឡើងកម្តៅខ្ពស់ស្របពេលមានភាពមិនចាញ់មិនឈ្នះរវាងប្រទេសទាំងពីរជុំវិញការចាប់ និងឃាត់ទុកនាវាដឹកប្រេងជាច្រើនគ្រឿងនោះ។
កងការពារបដិវត្តន៍របស់អ៊ីរ៉ង់ បានចាប់នាវាដែលមានទង់ជាតិអង់គ្លេសនៅក្នុងច្រកសមុទ្រ Hormuz កាលពីថ្ងៃសុក្រសប្តាហ៍មុន ជាការសងសឹកចំពោះក្រុមអាជ្ញាធរអង់គ្លេស ដែលចាប់ និងឃាត់នាវាអ៊ីរ៉ង់មួយគ្រឿងនៅក្នុងមហាសមុទ្រមេឌីទែរ៉ាណេ កាលពីថ្ងៃទី ៤ ខែ កក្កដា។
-ភាពមិនប្រាកដប្រជាផ្នែកសេដ្ឋកិច្ចៈ លោក ចនសុន ទទួលខុសត្រូវជាមួយ និងកំណើនសេដ្ឋកិច្ចពិភពលោកដែលត្រូវបានព្យាករថា ធ្លាក់ចុះ ហើយសេដ្ឋកិច្ចអង់គ្លេសដែលបង្ហាញថា កំណើនយឺតស្របពេលភាពមិនប្រាកដប្រជានៃការចាកចេញពីសហភាពអឺរ៉ុបនៅតែបន្ត និងការចាកចេញពី EU ដោយគ្មានកិច្ចព្រមព្រៀង នៅតែជាបញ្ហាស្មុគស្មាញដដែល។
ការព្យាករផ្លូវការរបស់រដ្ឋាភិបាល បានព្រមានកាលពីសប្តាហ៍មុនថា ប្រទេសនេះ នឹងធ្លាក់ក្នុងវិបត្តិសេដ្ឋកិច្ចរយៈពេល ២ ឆ្នាំ ប្រសិនបើចាកចេញពីប្លុកនេះ ដោយគ្មានកិច្ចព្រមព្រៀងនោះ៕ AFP/PSA