.jpg)
លោក Jurin (កណ្តាល) ប្រកាសសម្រេចចូលរួមរដ្ឋាភិបាលចម្រុះ។ BKP
ក្រុងបាងកកៈ គណបក្សប្រជាធិបតេយ្យ បានសម្រេចចិត្តចូលរួមរដ្ឋាភិបាលចម្រុះ ដែលដឹកនាំដោយបក្ស ផាឡាំង ប្រាឆារ៉ាត់ (PPRP) ក្រោយពី PPRP បានផ្តល់តំណែងរដ្ឋមន្ត្រីកសិកម្ម និងពាណិជ្ជកម្មឲ្យបក្សនេះ ខណៈទទួលយកការទាមទាររបស់ខ្លួនឲ្យធ្វើវិសោធនកម្មរដ្ឋធម្មនុញ្ញ។
ក្រោយពីការជជែកដេញដោលយ៉ាងផុសផុលរយៈពេល ៥ ម៉ោង កាលពីថ្ងៃអង្គារ ជំនួបនៃក្រុមនាយកប្រតិបត្តិបក្សប្រជាធិបតេយ្យ និងសមាជិកសភាត្រូវបានសម្រេចដោយការបោះឆ្នោត ដែលមានសំឡេងគាំទ្រ ៦១ សំឡេង ទល់នឹង ១៦ សំឡេង អនុបវាទ ២ សំឡេង ដើម្បីចូលរួមរដ្ឋាភិបាលចម្រុះដឹកនាំដោយបក្ស PPRP។
ដោយថ្លែងក្រោយពីជំនួបនោះ មេដឹកនាំបក្សប្រជាធិបតេយ្យ លោក Jurin Laksanavisit បានបញ្ជាក់ថា គណបក្សប្រជាធិបតេយ្យ បានសម្រេចចិត្តចូលរួមជាគណបក្សចម្រុះដឹកនាំដោយបក្ស PPRP ក្រោយពីការទាមទាររបស់គណបក្សនេះត្រូវបានគេឯកភាព។
លោក Jurin បានថ្លែងថា លក្ខខណ្ឌមុនបានរាប់បញ្ចូល ការដាក់បញ្ចូលគោលនយោបាយបក្សទៅលើការធានាប្រាក់ចំណូលសម្រាប់កសិករ និងការធ្វើវិសោធនកម្មច្បាប់រដ្ឋធម្មនុញ្ញ។
លោក Jurin បានថ្លែងទៀតថា៖ «យើងបានដឹងថា មធ្យោបាយណាក៏ដោយ ក៏យើងបានសម្រេចចិត្តរួចដែរ ហើយយើងក៏នឹងត្រូវរងការរិះគន់ដែរ។ ដូច្នេះយើងត្រូវជ្រើសរើសយក ផលប្រយោជន៍សម្រាប់ប្រទេសជាតិ ដើម្បីបញ្ចប់ភាពមិនប្រាកដប្រជា និងភាពជាប់គាំងនយោបាយ៕ BKP/PSA
