.jpg)
ឆ្មាំសមុទ្របង់ក្លាដែស ឈរថតជាមួយក្រុមជនភៀសខ្លួនរ៉ូហ៊ីងយ៉ានៅទន្លេទិកណាហ្វ។ AFP
ក្រុងបាហ្សារៈ ក្រុមមន្ត្រីបាននិយាយកាលពីថ្ងៃសៅរ៍ថា ក្រុមអាជ្ញាធរបង់ក្លាដែស បានឃាត់ខ្លួនជនភៀសខ្លួនរ៉ូហ៊ីងយ៉ា ៨៤ នាក់ មកពីប្រទេស មីយ៉ាន់ម៉ា មិនឲ្យធ្វើដំណើរតាមទូកទៅកាន់ប្រទេស ម៉ាឡេស៊ី។
ប៉ូលិសនៅតំបន់ Pekua បាននិយាយថា ជនមូស្លីមរ៉ូហ៊ីងយ៉ាមកពីជំរំ Kutupalong ជាកន្លែងតាំងទីលំនៅជនភៀសខ្លួនធំបំផុតនៅក្នុងពិភពលោក ត្រូវបានឃាត់ខ្លួន ខណៈពួកគេ បានរង់ចំាជិះទូកនេសាទ ដើម្បីឆ្លងទៅប្រទេស ម៉ាឡេស៊ី។
នៅក្នុងចំណោមពួកគេ មានស្ត្រី ៣១ នាក់ និងក្មេង ១៥ នាក់។
នៅលើកោះSaint Martin ជាកោះតូចមួយនៅឈូងសមុទ្របេងហ្គាលឆ្មាំការពារដែនសមុទ្ររបស់ប្រទេសនេះ បានឃាត់ខ្លួនជនភៀសខ្លួនរ៉ូហ៊ីងយ៉ា ១៧ នាក់ផ្សេងទៀត និងអ្នកជួញដូរមនុស្ស ៥ នាក់ នៅមុនពេលពួកគេឡើងជិះទូកនេសាទ ១ គ្រឿង។
លោក Fayezul Islam Mondol ជាមេបញ្ជាការឆ្មាំការពារដែនសមុទ្រក្នុងតំបន់បាននិយាយថា ពួកគេបានធ្វើដំណើរផ្សងគ្រោះថ្នាក់បំផុត។
ជនភាគតិចរ៉ូហ៊ីងយ៉ាប្រហែល ៧៤ ម៊ឺននាក់ បានភៀសខ្លួនចេញពីប្រទេស មីយ៉ាន់ម៉ា ទៅកាន់ប្រទេស បង់ក្លាដែស ចាប់តាំងពីការបង្ក្រាបរបស់យោធា បានចាប់ផ្តើមនៅក្នុងខែ សីហា ឆ្នាំ ២០១៧។
ពួកគេបានចូលរួមជាមួយជនរ៉ូហ៊ីងយ៉ា ៣០ ម៊ឺននាក់ផ្សេងទៀត ដែលបានរស់នៅក្នុងជំរំដែលមានមនុស្សយ៉ាងកកកុញនៅក្នុងតំបន់បាហ្សារ បន្ទាប់ពីពួកគេបានរត់ភៀសខ្លួនចេញពីអំពើហិង្សានៅប្រទេស មីយ៉ាន់ម៉ានោះ។
ជនភៀសខ្លួនរាប់ពាន់នាក់ បានព្យាយាមរត់ភៀសខ្លួនចេញពីជំរំក្នុង ១ ឆ្នាំៗ ដើម្បីស្វែងរកឱកាសល្អប្រសើរនៅក្នុងប្រទេសជាច្រើនដូចជានៅប្រទេស ម៉ាឡេស៊ី និងថៃ ជាដើម។
ជារឿយៗពួកគេ បានចំណាយលុយដែលគេសន្សំ ដើម្បីធ្វើដំណើរផ្សងគ្រោះថ្នាក់ដោយជិះទូកនេសាទតូចៗដែលពួកគេជឿថា ពួកគេនឹងមានជីវភាពល្អប្រសើរ៕ AFP/PSA
