.jpg)
អ្នកតវ៉ាអាវកាក់ពណ៌លឿងបារាំងដុតកង់អគ្គិសនី ពេលប៉ះទង្គិចជាមួយប៉ូលិស កាលពីថ្ងៃទី ២១ ខែ កញ្ញា ឆ្នាំ ២០១៩។ រូបថត AFP
ក្រុងប៉ារីស៖ បាតុករជាង ១០០ នាក់ ត្រូវបានចាប់ខ្លួន នៅឯកន្លែងតវ៉ារបស់ក្រុមអាវកាក់ពណ៌លឿងនៅក្នុងទីក្រុងប៉ារីស កាលពីថ្ងៃសៅរ៍ ខណៈដែលប៉ូលិសប្រហែល ៧ ៥០០ នាក់ ត្រូវបានដាក់ពង្រាយ ដើម្បីដោះស្រាយភាពជាប់គាំងជាមួយក្រុមចលនាអនាធិបតេយ្យជ្រុលនិយម ឬហៅថា ក្រុម (black blocs) នោះ។
ក្រុមអាជ្ញាធរបានថ្លែងថា ក្រោយពីការដង្ហែក្បួនលើកដំបូងជាមួយក្រុមអាវកាក់ពណ៌លឿងនោះ ក្រុមអ្នកតវ៉ាជ្រុលនិយមប្រហែល ១ ០០០ នាក់ បានចូលរួម ដង្ហែក្បួនដាច់ដោយឡែកពីគ្នាមួយទៀត ប្រឆាំងការប្រែប្រួលអាកាសធាតុ ជាទីដែលពួកគេ បានបង្កឲ្យមានការប៉ះទង្គិចជាច្រើនលើកជាមួយប៉ូលិស។
អគារធនាគារ ២ ត្រូវបានខូចខាតនៅក្នុងការប៉ះទង្គិចគ្នា នៅក្នុងនោះមានម៉ូតូវ៉ែស្ប៉ាបង្អួច និងទ្រព្យសម្បត្តិសាធារណៈជាច្រើនផ្សេងទៀត។ សកម្មជនខ្លះ បានសាងសង់រនាំងបិទផ្លូវបណ្តោះអាសន្នជាច្រើនកន្លែង ដែលបន្ទាប់មកពួកគេ បានដុតវាឲ្យឆេះ។
ប៉ូលិសជួយស្រ្តីមា្នក់ដែលកំពុងស្រែកយំនិងយួរអីវ៉ាន់ ខណៈប៉ូលិសប្រើឧស្ម័នបង្ហូរទឹកភ្នែកប្រឆាំងអ្នកតវ៉ា។ AFP
ក្រុមអ្នករៀបចំដង្ហែក្បួននៃ ការប្រែប្រួលអាកាសធាតុបានជំរុញឲ្យក្រុមអ្នកតវ៉ាត្រឡប់ទៅផ្ទះវិញ ដើម្បីបញ្ចៀសការប៉ះទង្គិចគ្នា ដែលទាក់ទងនឹងការចោទប្រកាន់ការប្រើប្រាស់ឧស្ម័នបង្ហូរទឹកភ្នែក និងដំបងឆក់ផងនោះ។
ចលនាអាវកាក់ពណ៌លឿង បានផ្ទុះធ្វើបាតុកម្មអស់រយៈពេល ១០ ខែមកនោះ ហើយបានវាយប្រហារលោកប្រធានាធិបតីអេម៉ានុយអែល ម៉ាក្រុង ដែលក្រុមអ្នកតវ៉ា បានចោទប្រកាន់លោកពីបទខ្វះការយកចិត្តទុកដាក់ទៅលើតម្រូវការ របស់ប្រជាជនសាមញ្ញ។
ស្ត្រីអ្នកតវ៉ាម្នាក់ ដែលសុំមិនបញ្ចេញឈ្មោះ បាននិយាយថា៖ «យើងកំពុងប្រមូលផ្តុំគ្នាគ្រាន់តែចង់បញ្ចេញមតិថា យើងមិនអាចរកចំណូលបានគ្រប់គ្រាន់ដើម្បីទិញសម្ភារដែលត្រូវការទេ»។ (ការតវ៉ា) នេះមិនមែនគ្រាន់តែប្រឆាំងលោកប្រធានាធិបតីតែប៉ុណ្ណោះនោះទេ ថែមទាំងជាការប្រឆាំងប្រព័ន្ធគ្រប់គ្រងទៀតផង»។
ប៉ូលិសប្រឆាំងកុបកម្ម ឈរនៅលើផ្លូវមួយនៅក្នុងអំឡុងការជួបជុំប្រឆាំងរដ្ឋាភិបាល«ចលនាអាវកាក់ពណ៌លឿង»។
ក្រុមផ្សេងទៀត បានប្រកាសបដិសេធអ្វីដែលពួកគេបាននិយាយថា គឺជាការបង្ក្រាបជ្រុលហួសហេតុដោយក្រុមកងកម្លាំងសន្តិសុខទាំងនោះ។
អ្នកតវ៉ាម្នាក់ឈ្មោះ Pierre ដែលភ្នែករបស់លោកឡើងក្រហមដោយសារតែត្រូវឧស្ម័នបង្ហូរទឹកភ្នែក បាននិយាយថា៖ «នេះ គឺជាឋាននរក យើងមានគ្នាតិចជាង ១០០ នាក់ប៉ុណ្ណោះ ហើយប៉ូលិសចាប់ខ្លួនពួកគេ។ នោះ គឺលោក David ប្រឆាំងនឹងលោក Goliath»។
ការតវ៉ារៀងរាល់សប្តាហ៍ ថ្ងៃសៅរ៍ គឺជាលើកទី ៤៥ បានជំរុញឲ្យលោក ម៉ាក្រុង បន្ធូរបន្ថយការដំឡើងពន្ធរបស់រដ្ឋ ដើម្បីកាត់បន្ថយទឹកប្រាក់ជិត ១៧ ពាន់លានអឺរ៉ូក្នុងការដំឡើងពន្ធ និងកាត់បន្ថយពន្ធសម្រាប់ក្រុមអ្នករកប្រាក់ចំណូលបានទាប ប៉ុន្តែត្រូវកាត់ តិចតួចនៅរដូវក្តៅនេះ។
ប៉ូលិសប្រឆាំងកុបកម្មប្រើឧស្ម័នបង្ហូរទឹកភ្នែកប្រឆាំងក្រុមអ្នកតវ៉ាក្នុងអំឡុងបាតុកម្មប្រឆាំងនឹងរដ្ឋាភិបាល។ AFP
ទោះបីជាយ៉ាងណាក៏ដោយ ក៏ការកាត់បន្ថយពន្ធ នៅតែត្រូវបានគេមើលឃើញថា តើចលនានោះ នឹងធ្វើឲ្យមានកម្លាំងចលករក្រោកតវ៉ាឡើងវិញ នៅរដូវរងា និងនៅដើមនិទាឃរដូវខាងមុខនេះ ឬយ៉ាងណា? ជាញឹកញាប់ការតវ៉ាបានឈានដល់ការប៉ះទង្គិចដោយហិង្សាជាច្រើនលើក ជាមួយក្រុមកងកម្លាំងសន្តិសុខជាពិសេសនៅក្នុងទីក្រុងប៉ារីសនេះតែម្តង។
នៅត្រឹមរសៀលថ្ងៃសៅរ៍ ប៉ូលិសបានចាប់ខ្លួនអ្នកតវ៉ា ១០៦ នាក់ ដោយបានបន្ថែមថា អ្នកតវ៉ាខ្លះ ត្រូវបានគេរកឃើញថា បានកាន់ញញួរ ឬដបសាំងទៀតផង។
ស្ត្រីមា្នក់ដែលមានឈ្មោះថា Brigitte បាននិយាយថា៖ «យើងត្រូវបានគេធ្វើបាបដូចឧក្រិដ្ឋជន»៕ AFP/SK
