កោះបាលី៖ បុរសជនជាតិថៃ ២ នាក់ ត្រូវបានតុលាការឥណ្ឌូនេស៊ីកាត់ទោសឲ្យជាប់គុក ១៦ ឆ្នាំ កាលពីថ្ងៃពុធ ក្រោយពីលេបថ្នាំមេតំហ្វេតាមីន ១ គីឡូក្រាម នៅក្នុងកិច្ចប្រឹងប្រែងរត់ពន្ធគ្រឿងញៀនមិនបានសម្រេច។
តុលាការស្រុកមួយនៅកោះបាលីបានសម្រេចទោស ដែលមានរយៈពេលតិចជាង ១៨ ឆ្នាំ ដែលក្រុមរដ្ឋអាជ្ញាទាមទារសម្រាប់លោក Prakob Seetasang មានវ័យ ៣០ ឆ្នាំ និងលោក Adison Phonlamat មានវ័យ ២០ ឆ្នាំ។
បុរសទាំង ២ នាក់ ត្រូវបានចាប់ខ្លួននៅលើកោះលម្ហែកម្សាន្តនេះ កាលពីដើមឆ្នាំនេះ ក្រោយពីមកដល់កោះនេះ ដោយជិះយន្តហោះមកពីក្រុងបាងកក។
ពួកគេបានបដិសេធមិនប្តឹងឧទ្ធរណ៍ប្រឆាំងនឹងការកាត់ទោសរបស់ពួកគេទេ ក្រោយពីពួកគេត្រូវបានរកឃើញថា មានទោសកាលពីថ្ងៃពុធនោះ។
លោកមេធាវី Aji Sibalan បានថ្លែងប្រាប់គណៈកម្មាធិការវិនិច្ឆ័យថា៖ «ក្រោយពិភាក្សារួច យើងជាតំណាងរបស់ជនជាប់ចោទ បានសម្រេចទទួលយកសាលក្រមនោះ»។
ចៅក្រមជំនុំជម្រះឈ្មោះ Heriyanti ដែលគេស្គាល់តែឈ្មោះមួយនោះបាននិយាយថា ជនជាតិថៃទាំង ២ រូបនេះ ក៏ត្រូវបង់ផាកពិន័យ ១៤២ ០០០ ដុល្លារ បើមិនដូច្នេះទេត្រូវជាប់ពន្ធនាគារ ១ ឆ្នាំថែមទៀត។
ប្រទេស ឥណ្ឌូនេស៊ី ដែលភាគច្រើនកាន់សាសនាមូស្លីម មានច្បាប់ខ្លះតឹងរ៊ឹងជាងគេបំផុតនៅក្នុងពិភពលោក ក្នុងនោះមានទោសប្រហារជីវិតសម្រាប់អ្នកជួញដូរគ្រឿងញៀន។
នៅក្នុងឆ្នាំ ២០១៥ ជនជាតិអូស្ត្រាលីឈ្មោះ Andrew Chan និងឈ្មោះ Myuran Sukumaran ជាមេដឹកនាំក្រុមដែលជាប់ចោទនៃអ្វី ដែលគេហៅថា ក្រុមហេរ៉ូអ៊ីន Bali Nine ត្រូវប្រហារជីវិតដោយក្រុមអ្នកបាញ់សម្លាប់៕ AFP/PSA