ក្រុងដាក្កា៖ ក្រុមមន្ត្រីបាននិយាយកាលពីថ្ងៃពុធថា មនុស្សម្នាក់ដែលត្រូវបានគេជឿថាជាជនភៀសខ្លួនរ៉ូហ៊ីងយ៉ា ត្រូវសង្ស័យថា បានស្លាប់នៅក្នុងការផ្ទុះគ្រាប់មីននៅតាមបណ្តោយព្រំដែនបង់ក្លាដែស-មីយ៉ាន់ម៉ា។
ជនជាតិភាគតិចមូស្លីមរ៉ូហ៊ីងយ៉ាជិតមួយលាននាក់រស់នៅក្នុងជំរំនានានៅក្នុងប្រទេស បង់ក្លាដែសភាគអាគ្នេយ៍ ក្រោយពីបានភៀសខ្លួនពីអំពើហិង្សាយោធានៅក្នុងប្រទេស មីយ៉ាន់ម៉ា ហើយតាមធម្មតាប្រើប្រាស់ព្រំដែនដែលធ្លុះធ្លាយដើម្បីធ្វើដំណើរត្រឡប់ទៅរដ្ឋរាក់ឃីនវិញ។
ក្រុមមន្ត្រីបង់ក្លាដែស បានចោទក្រុមមន្ត្រីមីយ៉ាន់ម៉ាថា បានដាក់មីននៅតាមតំបន់នានាបណ្តោយព្រំដែនដើម្បីរារាំងមិនឲ្យក្រុមជនភៀសខ្លួនត្រឡប់ទៅស្រុកភូមិរបស់ពួកគេវិញ។
ក្រុមឆ្មាំព្រំដែនបង់ក្លាដែសបាននិយាយថា ពួកគេបានឮសំឡេងផ្ទុះយ៉ាងខ្លាំងកាលពីថ្ងៃអង្គារ និងបានឃើញបុរស ៣-៤ នាក់ បានចោលមនុស្សម្នាក់ ដែលរងរបួសយ៉ាងធ្ងន់ធ្ងរនៅភូមិ Ghumdum នៅព្រំដែន។
មន្ត្រីជាន់ខ្ពស់ម្នាក់នៃឆ្មាំព្រំដែនបង់ក្លាដែស (BGB) បានថ្លែងប្រាប់ AFP កាលពីថ្ងៃពុធក្នុងលក្ខខណ្ឌអនាមិកថា៖ «យើងសង្ស័យថា គាត់បានស្លាប់នៅក្នុងការផ្ទុះមីននៅក្នុងប្រទេស មីយ៉ាន់ម៉ា ហើយបន្ទាប់មកមនុស្សទាំងអស់នោះ បានសែងចូលក្នុងដែនដីបង់ក្លាដែស»។
មេបញ្ជាការតំបន់របស់ BGB លោក Ali Haider Azad Ahmed បានថ្លែងថា បុរសដែលស្លាប់នោះត្រូវគេជឿថា ជាជនភៀសខ្លួនរ៉ូហ៊ីងយ៉ា។
បុរសនោះមានវ័យខ្ទង់ ៣០ ឆ្នាំ មិនទាន់ស្គាល់អត្តសញ្ញាណ៕ AFP/PSA