ក្រុងហ្ស៊ឺណែវ៖ រដ្ឋមន្ត្រីការបរទេសប៉ាគីស្ថានកាលពីថ្ងៃពុធ បានព្រមានថាស្ថានការណ៍នៅតំបន់កាស្មៀរគ្រប់គ្រងដោយឥណ្ឌា ប្រឈមនឹងការបង្ក «សង្គ្រាមបណ្តាលឲ្យគ្រោះថ្នាក់» និងបានជំរុញឲ្យប្រមុខសិទ្ធិមនុស្សអង្គការសហប្រជាជាតិលោកស្រី Michelle Bachelet ធ្វើដំណើរទស្សនកិច្ចទៅកាន់តំបន់ដែលកំពុងមានបញ្ហានោះ។
ដោយបានថ្លែងទៅកាន់ក្រុមអ្នកកាសែតនៅក្រៅសង្វៀននៃជំនួបក្រុមប្រឹក្សាសិទ្ធិមនុស្សអង្គការសហប្រជាជាតិនៅក្នុងក្រុងហ្សឺណែវ លោក Shah Mehmood Qureshi បានថ្លែងថា លោកបានជឿថា ទាំងប្រទេស ប៉ាគីស្ថាន និងឥណ្ឌា យល់ពីផលវិបាកនៃជម្លោះ។
ប៉ុន្តែដោយភាពតានតឹងកើនឡើងខ្លាំងចាប់តាំងពីក្រុងញូវដែលី បានដកស្វ័យភាពពីតំបន់កាស្មៀរកាលពីខែមុននេះ លោកព្រមានថា អ្នកមិនអាចបដិសេធសង្គ្រាមដែលបណ្តាលឲ្យគ្រោះថ្នាក់នោះបានទេ។
លោក Qureshi បានថ្លែងថា៖ «ប្រសិនបើស្ថានការណ៍នៅតែបន្តកើតមាន នៅពេលនោះ ពិតជាមានរឿងអ្វីមួយកើតឡើងជាមិនខាន»។
ឥណ្ឌាបានដាក់ពង្រាយទាហាននៅតំបន់កាស្មៀរកាលពីថ្ងៃទី ៥ ខែ សីហា ដើម្បីទប់ស្កាត់មិនឲ្យភាពចលាចលកើតឡើង ខណៈក្រុងញូវដេលីបានដកស្វ័យភាពតំបន់ដែលមានជម្លោះនេះ។ បណ្តាញទូរស័ព្ទដៃ និងអ៊ីនធឺណិតស្ទើរតែទាំងអស់ត្រូវបានកាត់ផ្តាច់លើកលែងតំបន់ខ្លះ។
ភាពតានតឹងជុំវិញតំបន់កាស្មៀរដែលត្រូវបានបែងចែករវាងឥណ្ឌា និងប៉ាគីស្ថាន តាំងពីឆ្នាំ ១៩៤៧ បានបង្កឲ្យមានសង្គ្រាមធំៗ ២ លើក៕ AFP