ក្រុងវ៉ាស៊ីនតោន៖ រដ្ឋមន្ត្រីការបរទេសអាមេរិកលោក ម៉ៃក៍ ប៉ុមប៉េអូ កាលពីថ្ងៃចន្ទ បានអះអាងថា ក្រុមមេដឹកនាំអ៊ីរ៉ាក់បានថ្លែងប្រាប់លោកជាលក្ខណៈឯកជនថា ពួកគេបានគាំទ្រវត្តមានយោធាអាមេរិក ទោះបីជាមានការបង្ហាញជាសាធារណៈឲ្យពួកគេចាកចេញពីអ៊ីរ៉ាក់ក្តី។
សភាអ៊ីរ៉ាក់កាលពីសប្តាហ៍មុន បានបោះឆ្នោតឲ្យបណ្តេញកងកម្លាំងបរទេស ក្រោយពីអាមេរិកបានវាយប្រហារទៅលើព្រលានយន្តហោះក្រុងបាកដាដ បានសម្លាប់ឧត្តមសេនីយ៍កំពូលរបស់អ៊ីរ៉ង់ម្នាក់ដែលមានឥទ្ធិពលយ៉ាងខ្លាំងនៅអ៊ីរ៉ាក់។
ប៉ុន្តែលោក ម៉ៃក៍ ប៉ុមប៉េអូ ដែលក្រសួងការបរទេសរបស់លោក ជាញឹកញាប់បានអះអាងថា ខ្លួនមិនអាចប្រាប់ព័ត៌មានលម្អិតអំពីការសន្ទនាតាមទូរស័ព្ទរបស់លោកនោះទេ លោកបានថ្លែងថា លោកបានដឹងអំពីសារខុសៗគ្នាមួយ នៅក្នុងការសន្ទនាជាមួយក្រុមមេដឹកនាំអ៊ីរ៉ាក់ប្រហែល ៥០ នាក់ ចាប់តាំងពីដើមខែនេះ។
លោក ប៉ុមប៉េអូ បានថ្លែងនៅក្នុងការឆ្លើយសំណួរ នៅឯវេទិកាមួយនៅសាកលវិទ្យាល័យស្តេនហ្វ៉តថា៖ «ពួកគេមិនចង់និយាយជាសាធារណៈនោះទេ ប៉ុន្តែជាលក្ខណៈឯកជនពួកគេទាំងអស់បានស្វាគមន៍ការពិតដែលថា អាមេរិកនៅតែកំពុងធ្វើយុទ្ធនាការប្រយុទ្ធប្រឆាំងភេរវកម្មរបស់ខ្លួននៅទីនោះ»។
លោក ប៉ុមប៉េអូ បានថ្លែងថា កងកម្លាំងអាមេរិកកំពុងធានាថា ក្រុមជ្រុលនិយមរដ្ឋអ៊ិស្លាមមិនអាចបង្កើតឡើងវិញជាដាច់ខាត និង «ការផ្តល់ឱកាសមួយសម្រាប់ជនជាតិអ៊ីរ៉ាក់ ដើម្បីទទួលបានអធិបតេយ្យភាព និងឯករាជ្យដែលជនជាតិអ៊ីរ៉ាក់ចង់បាន»។
លោក ប៉ុមប៉េអូ ដែលបានបង្កើតវេទិកាជាមួយបុព្វាធិការីម្នាក់លោកស្រី ខនឌូលីហ្សារ៉ៃយ៍ បានថ្លែងថា លោកបានថ្លែងទៅកាន់ក្រុមមេដឹកនាំដែលមានបទពិសោធទាំងអស់នៅអ៊ីរ៉ាក់ ភាគច្រើនកាន់និកាយស៊ីអ៊ីត៕ AFP/SK