.jpg)
ទាហានថៃដើរចូលទៅកាន់តំបន់រូងភ្នំTham Luang ខណៈកិច្ចប្រតិបត្តិជួយសង្រ្គោះនៅបន្តនោះ។ AFP
ស្រុកមែសៃៈ ប៉ូលិសនិងទាហានជើងទឹក បានប្រាប់ AFP ថា ក្រុមអ្នកសង្រ្គោះថៃ បាននាំយកក្មេងប្រុសទី ៩ ម្នាក់ ចេញពីរូងភ្នំ Tham Luang នៅរសៀលថ្ងៃអង្គារនេះ ក្រោយពីពួកគេជាប់នៅក្នុងរូងភ្នំ ១៨ ថ្ងៃ ហើយនោះ។
ប្រភពប៉ូលិស បានឲ្យដឹងថា៖ «ក្មេងប្រុសទី ៩ នោះ ចេញផុតពីរូងភ្នំនោះហើយ ខណៈប្រភពទាហានជើងទឹកថៃ បានបញ្ជាក់ថា ក្មេងប្រុសនោះ ត្រូវបញ្ជូនចេញពីច្រកភ្នំនោះ ទៅកាន់មន្ទីរពេទ្យ»។
កាលពីព្រឹកថ្ងៃអង្គារដដែរនេះ ក្រុមមន្ត្រី បាននិយាយថា ក្មេងប្រុស ៨ នាក់ដំបូងត្រូវបានសង្រ្គោះចេញពីរូងភ្នំមានស្មារតីល្អ និងសុខភាពល្អ និងកំពុងស្នើសុំស្ករសូកូឡា ថ្វីបើពីរនាក់ កំពុងត្រូវបានព្យាបាលជំងឺ ក្រោយពីត្រូវបានធ្វើតេស្តរកឃើញរោគរលាកសួត។
លោក Jesada Chokedamrongsuk លេខាអចិន្ត្រៃយ៍នៃក្រសួងសុខាភិបាល បានថ្លែងប្រាប់ក្រុមកាសែតនៅមន្ទីរពេទ្យឈៀងវ៉ៃ ថា៖«ពួកគេគ្រប់គ្នាមានស្មារតីល្អ»។
លោក បានថ្លែងទៀតថា៖ «គ្មាននរណាម្នាក់ក្នុងចំណោមក្មេងទាំង ៨ នាក់នោះ ឈឺគ្រុនក្តៅអីទេ នៅថ្ងៃនេះ»។
ក្មេងប្រុសទាំងនោះមានអាយុពី ១២ ឆ្នាំដល់ ១៦ ឆ្នាំ គឺជាអ្នកដំបូងគេ ដែលត្រូវបានយកចេញពីរូងភ្នំ កាលពីថ្ងៃអាទិត្យ និងថ្ងៃចន្ទ ខណៈ ៤ នាក់ ចុងក្រោយនិងគ្រូបង្វឹករបស់ពួកគេ បានចំណាយពេលយប់ទី ១៧ នៅក្នុងរូងភ្នំនោះ៕ PSA
