.jpg)
អ្នកតវ៉ា ប្រឈមមុខដាក់គ្នាជាមួយក្រុមប៉ូលិសនៅផ្លូវ Harcourt ក្រៅស្នាក់ការរដ្ឋាភិបាល។ AFP
ក្រុងហុងកុងៈ ប៉ូលិសនៅក្រុងហុងកុងប្រើប្រាស់ស្រៃ្បយ៍ម្រេច និងដំបងប្រឆាំងក្រុមអ្នកតវ៉ាប្រឆាំងនឹងរដ្ឋាភិបាល ដែលបានកាន់កាប់ផ្លូវហាយវ៉េនានាកាលពីព្រឹកថ្ងៃចន្ទនៅមុនអ្វីដែលត្រូវបានគេរំពឹងថា ជាការជួបជុំគាំទ្រលទ្ធិប្រជាធិបតេយ្យនៅថ្ងៃប្រារព្ធខួប ដែលអង់គ្លេសប្រគល់ក្រុងនេះទៅឲ្យចិនគ្រប់គ្រងវិញ។
ក្រុងពាក់កណ្តាលស្វយ័តនេះ ត្រូវរង្គោះរង្គើដោយសារបាតុកម្មធំៗ កាលពី ៣ សប្តាហ៍កន្លងទៅ នៅពេលដែលក្រុមអ្នកតវ៉ា បានទាមទារដកច្បាប់ដែលអនុញ្ញាតឲ្យធ្វើបត្យាប័នទៅចិនដីគោកវិញ។
ភាពតានតឹង បានកើនឡើងខ្លាំងនៅក្នុងមជ្ឈមណ្ឌលហិរញ្ញវត្ថុនៅពេលព្រឹកព្រលឹមកាលពីថ្ងៃចន្ទ ក្រោយពីក្រុមយុវជនជាច្រើនក្រុមដែលជួបជុំគ្នាបានកាន់កាប់ផ្លូវហាយវ៉េ ៣ សំខាន់ៗ ដោយបានដាក់របាំងដែក និងប្លាសិ្ទក ដើម្បីបិទផ្លូវ។
ប៉ូលិសប្រឆាំងកុបកម្ម ជាមួយមួកសុវត្ថិភាព និងខែល បានទប់ទល់ជាមួយក្រុមអ្នកតវ៉ានៅក្នុងសង្កាត់ Admiralty និងសង្កាត់ Wanchai នៃ ក្រុងហុងកុង។
ប៉ូលិសប្រឆាំងកុបកម្មជាមួយនឹងមួកសុវត្ថិភាព និងខែលត្រៀមទប់ទល់ជាមួយអ្នកតវ៉ា។AFP
អ្នកកាសែត AFP ម្នាក់នៅកន្លែងតវ៉ា បាននិយាយថា ភ្លាមៗក្រោយពីពិធីលើកទង់ជាតិ ដើម្បីប្រារព្ធខួប ដែលអង់គ្លេសប្រគល់ក្រុងនេះទៅឲ្យចិន ប៉ូលិសបានវាយទៅលើក្រុមអ្នកតវ៉ាដែលបានបិទផ្លូវ ១ ដោយយ៉ាងតិចមានស្រី្តម្នាក់ត្រូវបានគេឃើញថា ហូរឈាមចេញពីរបួសក្បាលរបស់នាង ក្រោយការប៉ះទង្គិចនោះ។
ការជួបជុំជាបន្តបន្ទាប់ គឺជាការបង្ហាញឲ្យឃើញពីការភ័យខ្លាចថា ចិនកំពុងបំបិទសេរីភាព និងវប្បធម៌របស់ក្រុងនេះដោយមានការជួយពីក្រុមមេដឹកនាំនៃមជ្ឈមណ្ឌលហិរញ្ញវត្ថុនេះដែលគាំទ្រក្រុងប៉េកាំង។
ទោះបីជាក្រុងហុងកុង ត្រូវបានអង់គ្លេសប្រគល់ទៅឲ្យចិនគ្រប់គ្រងនៅថ្ងៃទី ១ ខែ កក្កដាឆ្នាំ ១៩៩៧ ក្តី ក៏ក្រុងនេះនៅតែត្រូវបានគ្រប់គ្រងដាច់ដោយឡែកនៅក្រោមការរៀបចំ ដែលត្រូវបានគេស្គាល់ថា ប្រទេស ១ ប្រព័ន្ធ ២។
ក្រុងនេះ ពេញចិត្តនឹងសិទ្ធិសេរីភាពដែលមិនត្រូវបានគេឃើញមាននៅលើចិនដីគោកផ្តាច់ការ ប៉ុន្តែអ្នកស្រុកខ្លាចថាក្រុងប៉េកាំងបំភេ្លចចោលកិច្ចព្រមព្រៀងនោះ៕ AFP/PSA
