.jpg)
ទាហានស៊ូដង់ ឈរយាមនៅតាមផ្លូវមួយនៅក្នុងក្រុងខារទុំ កាលពីថ្ងៃទី ៩ ខែ មិថុនា។ AFP
ក្រុងខារទុំៈ ប៉ូលិសស៊ូដង់បានបាញ់ឧស្ម័នបង្ហូរទឹកភ្នែកកាលពីថ្ងៃអាទិត្យទៅលើក្រុមអ្នកតវ៉ា ដែលបានចូលរួមនៅថ្ងៃដំបូងនៃយុទ្ធនាការបះបោរស៊ីវិល ដែលគេហៅថា ជាការបង្ក្រាបទៅលើក្រុមអ្នកតវ៉ាបណ្តាលឲ្យមនុស្សស្លាប់។
សាក្សីឃើញផ្ទាល់ភ្នែកម្នាក់បានប្រាប់ AFP ថា ក្រុមអ្នកតវ៉ាបានប្រមូលកង់ឡាន ដើមឈើ និងដុំថ្មដើម្បីសាងសង់រនាំងបិទផ្លូវជាច្រើនកន្លែង នៅក្នុងស្រុកបាហ្សារ៉ីភាគខាងជើងក្រុងខារទុំ ប៉ុន្តែប៉ូលិសប្រឆាំងកុបកម្ម បានចាត់វិធានការភ្លាមៗនៅកន្លែងនោះ ហើយបានបាញ់ឧស្ម័នបង្ហូរទឹកភ្នែកទៅលើពួកគេ។
សាក្សីឃើញផ្ទាល់ភ្នែក បាននិយាយថា៖ «ផ្លូវស្ទើរតែទាំងអស់នៅក្នុងស្រុកបាហ្សារ៉ីត្រូវបានបិទ។ សូម្បីតែក្រុមអ្នកតវ៉ាកំពុងឈប់សម្រាកនៅតាមគេហដ្ឋាន ក៏មិនអាចចេញទៅធ្វើការបានដែរ»។
ការប៉ុនប៉ងថ្មីបំផុតដោយក្រុមអ្នកតវ៉ា ដើម្បីបិទផ្លូវនានានៅក្នុងទីក្រុង បានកើតឡើងជិត ១ សប្តាហ៍ ក្រោយពីមានការបង្ក្រាបទៅលើក្រុមអ្នកតវ៉ាបណ្តាលឲ្យមនុស្សរាប់សិបនាក់បានស្លាប់នៅខាងក្រៅទីបញ្ជាការយោធា។
ការបង្ក្រាបយ៉ាងបង្ហូរឈាមនោះបានបណ្តាលឲ្យក្រុមសមាគមវិជ្ជាជីវៈស៊ូដង់ ដែលបានធ្វើការតវ៉ាដំបូងប្រឆាំងលោកអូមារ-អាល់-បាសៀរដែលបានគ្រប់គ្រងអំណាចអស់ពេលជាយូរកាលពីខែធ្នូ ដើម្បីប្រកាសឲ្យមានយុទ្ធនាការបះបោរស៊ីវិលនៅទូទាំងប្រទេសចាប់ពីថ្ងៃអាទិត្យ។
បុរសម្នាក់ដើរសំដៅទៅរបាំងបិទផ្លូវមួយនៅក្រុងខារទុំក្នុងអំឡុងពេលយុទ្ធនាការស៊ីវិល។ AFP
ក្រុមសមាគមវិជ្ជាជីវៈស៊ូដង់ SPA បានថ្លែងថា ចលនានោះនឹងបញ្ចប់ទៅវិញក្រោយពីក្រុមមេដឹកនាំយោធា ដែលបានគ្រប់គ្រងអំណាច ក្រោយពីទម្លាក់លោក បារសៀរ បាន ២ ខែ ហើយក៏បានផ្ទេរអំណាចទៅឲ្យរដ្ឋាភិបាលស៊ីវិលមួយគ្រប់គ្រងជំនួសវិញ។
ក្រុមពលរដ្ឋនៅក្រុងខារទុំភាគច្រើន បានស្នាក់នៅក្នុងផ្ទះអស់រយៈពេល ២-៣ ថ្ងៃ ហើយនៅតាមសង្កាត់ពាណិជ្ជកម្មភាគច្រើនត្រូវបានបិទកាលពីថ្ងៃអាទិត្យ។
រថយន្តមួយចំនួនរបស់ក្រុមកងកម្លាំងគាំទ្ររហ័ស (RSF) ដែលបានអះអាងដោយក្រុមសាក្សីឃើញផ្ទាល់ភ្នែកជុំវិញការសម្លាប់កាលពីថ្ងៃចន្ទនោះ ត្រូវបានគេមើលឃើញថា កំពុងធ្វើសកម្មភាពឆ្លងកាត់ផ្លូវខ្លះនៃក្រុងខារទុំ ដែលបានដាក់ពង្រាយកម្លាំងប្រដាប់ដោយកាំភ្លើងស្វ័យប្រវត្តិរួចជាស្រេច។
រថយន្តក្រុងជាច្រើនគ្រឿងមិនបានដំណើរការនៅក្នុងសង្កាត់មួយចំនួន ប៉ុន្តែក្រុមរថយន្តឯកជនខ្លះ កំពុងដឹកអ្នកដំណើរនៅក្នុងតំបន់ខ្លះនៃក្រុងខារទុំនោះ ទោះបីជាផ្លូវ ខ្លះត្រូវបានបិទក្តី។ AFP/SK
