ក្រុងប៉ារីសៈ ក្រុមអ្នកតវ៉ាប្រឆាំងរដ្ឋាភិបាល បានដុតរថយន្តរាប់សិបគ្រឿង និងដុតភ្លើងនៅមុខហាងលក់ទំនិញនៅក្នុងអំឡុងការប៉ះទង្គិចពេញ ១ ថ្ងៃជាមួយប៉ូលិសប្រឆាំងកុបកម្មនៅទូទាំងក្រុងប៉ារីសភាគកណ្តាលកាលពីថ្ងៃសៅរ៍ ខណៈមនុស្សរាប់ពាន់នាក់ បានចូលរួមក្នុងការតវ៉ាមួយឈ្មោះថា «អាវកាក់ពណ៌លឿង» ប្រឆាំងនឹងពន្ធប្រេងកើនឡើងខ្ពស់។
ក្រុមប៉ូលិស បានឆ្លើយតបដោយឧស្ម័នបង្ហូរទឹកភ្នែកក្រោយពីក្រុមអ្នកតវ៉ាគប់ដុំថ្មនិងវត្ថុផ្សេងៗ នៅពេលតវ៉ាសប្តាហ៍ទី ៣ ដែលជាការប្រឆាំងលោកប្រធានាធិបតី អេម៉ានុយអែល ម៉ាក្រុង។
ផ្សែងយ៉ាងខ្មួលខ្មៅ បានហ៊ុមព័ទ្ធសង្កាត់ជាច្រើន ខណៈអំពើហិង្សា បានរាលដាលពីវិមាន Arc de Triomphe ជាទីដែលហ្វូងមនុស្សបានធ្វើការជួបជុំគ្នា ដើម្បីហែក្បួនទៅកាន់ទីលាន Champs-Elysees។
ខណៈមនុស្សរាប់សិបនាក់ត្រូវបានអនុញ្ញាតឲ្យចូលរួមក្រោយពីមានការត្រួតពិនិត្យនិងឆែករកកាតសម្គាល់ខ្លួន អ្នកខ្លះពាក់ម៉ាសការពារឧស្ម័នឬ វ៉ែនតាជិះស្គី នៅពីក្រោយវាយប៉ូលិស ដែលការពាររបាំងផ្លូវ និងកាណុងទឹក។
ក្រុមអ្នកតវ៉ា បានប៉ះទង្គិចជាមួយប៉ូលិសនៅផ្នែកខ្លះនៃរដ្ឋធានីប៉ារីស ដោយបានដុតបំផ្លាញរថយន្ត និងសម្ភារសំណង់ ព្រមទាំងវាយកម្ទេចបង្អួចអគារជាច្រើន។
ប្រភពមួយប្រាប់ AFP ថាកាំភ្លើងវែង ១ ដើម ត្រូវបានគេលួចយកបាត់ពីរថយន្តប៉ូលិស ១ គ្រឿង ប៉ុន្តែមិនច្បាស់ថា តើ កាំភ្លើងនោះ ត្រូវបានគេដាក់នៅកន្លែងណាទេ៕