ក្រុងសេអ៊ូលៈ របាយការណ៍ថ្មីៗរបស់អង្គការសហប្រជាជាតិបានឲ្យដឹងថា ប្រជាជនកូរ៉េខាងជើងជិតពាក់កណ្តាល បានរងទុក្ខដោយសារតែការបរិភោគមិនគ្រប់គ្រាន់ ខណៈប្រទេសក្រីក្រមួយនេះ បានប្រយុទ្ធប្រឆាំងជាមួយនឹងការខ្វះស្បៀងអាហារកាន់តែអាក្រក់ឡើងនោះ។
យោងតាមអង្គការសន្តិសុខស្បៀងអាហារ និងអាហារូបត្ថម្ភនៅក្នុងពិភពលោកឆ្នាំ ២០១៩ ដែលបានចេញផ្សាយដោយអង្គការស្បៀងអាហារនិងកសិកម្ម (FAO) កាលពីថ្ងៃចន្ទបានឲ្យដឹងថា ការរីករាលដាលនៃការបរិភោគមិនគ្រប់គ្រាន់របស់ប្រជាជននៅប្រទេស កូរ៉េខាងជើង បានកើនឡើងរហូតដល់ ៤៧,៨ ភាគរយ ចាប់តាំងពីឆ្នាំ ២០១៦ ដល់ ២០១៨។
ចំនួននោះ បានកើនឡើងយ៉ាងខ្លាំងចាប់តាំងពីឆ្នាំ ២០០៤-២០០៦ ដែលជាតួលេខប្រៀបធៀបឈរនៅត្រឹមចំនួន ៣៥,៤ ភាគរយ និងអាចកើនឡើងរហូតដល់ ៤៣,៤ ភាគរយ ដែលត្រូវបានគេរាយការណ៍ឆ្នាំ ២០១៥- ២០១៧។
មានប្រទេសចំនួន ៣ គឺ ប្រទេសសាធារណរដ្ឋអាហ្រ្វិកកណ្តាល ហ្ស៊ីមបាវ៉េ និងហៃទី ដែលបានរាយការណ៍ថា មានការរីករាលដាលនៃការបរិភោគមិនគ្រប់គ្រាន់កាន់តែច្រើនជាងកូរ៉េខាងជើង នៅក្នុងសេចក្តីរាយការណ៍ថ្មីៗនេះ។
របាយការណ៍នោះបាននិយាយថា៖ «ក្រោយពីសេដ្ឋកិច្ចឆ្លាក់ចុះមួយទសវត្សរ៍ ចំនួនប្រជាជនដែលបានរងទុក្ខដោយសារតែភាពអត់ឃ្លាន នៅក្នុងពិភពលោក បានកើនឡើងយ៉ាងយឺតអស់ក្នុងរយៈពេលប៉ុន្មានឆ្នាំជាប់គ្នានេះ»។
នៅក្នុងរបាយការណ៍ដាច់ដោយឡែកមួយកាលពីដើមខែនេះ គឺអង្គការ FAO និងកម្មវិធីស្បៀងអាហារពិភពលោក បាននិយាយថា ទិន្នផលដំណាំរបស់កូរ៉េខាងជើង បានធ្លាក់ចុះក្នុងកម្រិតទាបបំផុត ចាប់តាំងពីឆ្នាំ ២០០៨ ដោយគេបានប៉ាន់ប្រមាណថា មានប្រជាជន ១០ លាននាក់ ឬប្រហែល ៤០ ភាគរយ នៃប្រជាជនសរុបនោះត្រូវការស្បៀងអាហារ។
ទន្នឹមគ្នានោះ ស្ថានភាពនៃការបរិភោគមិនគ្រប់នៅកូរ៉េខាងជើងក្មេងៗ អាយុក្រោម ៥ ឆ្នាំ ធ្លាក់ចុះពី ២៧,៩ ភាគរយ ក្នុង ២០១២ មកត្រឹម ១៩,១ ភាគរយ ក្នុង ២០១៨៕ Yonhap/SK