ក្រុងប៉ារីសៈ ប្រធានាធិបតីបារាំង លោក អេម៉ានុយអែលម៉ាក្រុង កាលពីថ្ងៃអាទិត្យ បានធ្វើការវាយតម្លៃការខូចខាតបណ្តាលមកពីកុបកម្ម ១ ថ្ងៃនៅទូទាំងក្រុងប៉ារីស និងបាននាំឲ្យមានជំនួបដោះស្រាយវិបត្តិ ដែលបានបញ្ចប់ជាមួយនឹងការអំពាវនាវឲ្យមានកិច្ចពិភាក្សាបន្ថែមទៀត ជាមួយក្រុមសកម្មជនប្រឆាំងរដ្ឋាភិបាល ដែលធ្វើការតវ៉ា ២ សប្តាហ៍នោះ។
លោកម៉ាក្រុង បានជួបជាមួយនាយករដ្ឋមន្ត្រី រដ្ឋមន្ត្រីមហាផ្ទៃ និងក្រុមមន្ត្រីសន្តិសុខកំពូលៗ ដើម្បីឆ្លើយតបនឹងអំពើហិង្សា ដែលបានបង្កឲ្យមនុស្សរាប់រយនាក់រងរបួសនៅទូទាំងប្រទេស។
វិមាន Elysee បានឲ្យដឹងថាលោកនាយករដ្ឋមន្ត្រី Edouard Philippe ត្រូវបានស្នើឲ្យជួបជាមួយក្រុមអ្នករៀបចំការតវ៉ា និងក្រុមមេដឹកនាំបក្សជាផ្នែកនៃបំណងប្រាថ្នាឲ្យមានកិច្ចពិភាក្សាជាមួយគ្នា។
លោករដ្ឋមន្ត្រីក្រសួងបរិស្ថាន Francois de Rugy បានជួបក្រុមអ្នកតំណាងនៃក្រុមអ្នកតវ៉ា ដែលគេហៅថាក្រុមអ្នកតវ៉ា «អាវកាក់ពណ៌លឿង» កាលពីសប្តាហ៍មុនប៉ុន្តែខកខានមិនបានបញ្ចុះបញ្ចូលពួកគេឲ្យបញ្ចប់ការតវ៉ាទាំងនោះទេ។
រដ្ឋាភិបាល បានច្រានចោលការប្រកាសភាពអាសន្ន ដើម្បីទប់ទល់នឹងការតវ៉ា ដែលបានចាប់ផ្តើមប្រឆាំងការយកពន្ធប្រេងខ្ពស់នោះ ប៉ុន្តែក្លាយជាកំហឹងយ៉ាងធំទៅលើរបៀបវារៈរបស់លោកម៉ាក្រុង។
លោកប្រធានាធិបតីរូបនេះបានវាយតម្លៃការខូចខាតនៅឯវិមាន Arc de Triomphe ជាវិមានដ៏ធំបំផុតជាទីដែលមានកុបកម្មកើតឡើងនោះ។
នៅខាងក្នុងវិមាននោះ ក្រុមកុបករបានវាយបំផ្លាញមុខ រូបចម្លាក់ជារូបចម្លាក់បង្ហាញពីជ័យជម្នះឈ្មោះថា La Marseillaise របស់លោក Francois Rude។
លោកម៉ាក្រុង ក៏បានឃើញរថយន្តខូច ដែលបណ្តាលពីការដុត និងអគារជាច្រើនដែលខូចខាត ដោយសារកុបកម្មនៅកន្លែងដទៃទៀត ជាទីដែលលោកបានសរសើរប៉ូលិសចំពោះកិច្ចខិតខំប្រឹងប្រែងរបស់ពួកគេក្នុងការរក្សាសន្តិសុខ នៅពេលនោះ។
ប៉ូលិសក្រុងប៉ារីស បាននិយាយថា មនុស្ស ៤១២ នាក់ត្រូវបានចាប់ខ្លួនកាលពីថ្ងៃសៅរ៍នៅក្នុងអំឡុងការប៉ះទង្គិចអាក្រក់បំផុតសម្រាប់រយៈពេលជាច្រើនឆ្នាំនៅក្នុង រដ្ឋធានីនេះ និងមនុស្ស ៣៧៨ នាក់ នៅជាប់ឃុំនៅឡើយ។
ប៉ូលិសក្រុងប៉ារីស Michel Delpuech បានថ្លែងថា លោក បានចាត់ទុកអំពើហិង្សានោះជាអំពើហិង្សាធ្ងន់ធ្ងរបំផុត ដែលមិនធ្លាប់មានពីមុន និងជាកម្រិតមួយមិនធ្លាប់ឃើញជាច្រើនទសវត្សរ៍មកហើយ។
មនុស្ស ២៦៣ នាក់ បានរងរបួសនៅទូទាំងប្រទេស ដោយមនុស្ស ១៣៣ នាក់ រងរបួសនៅក្នុងរដ្ឋធានីនេះ នៅក្នុងនោះមាន ២៣ នាក់ជាសមាជិករបស់កងកម្លាំងសន្តិសុខ។
លោកម៉ាក្រុង បានថ្លែងថា៖ «ខ្ញុំមិនដែលទទួលស្គាល់អំពើហិង្សាទេ»។ គ្មានមូលហេតុដែលបញ្ជាក់ក្រុមអាជ្ញាធរ ត្រូវរងការវាយប្រហារទេ ហើយថា អាជីវកម្មជាច្រើនត្រូវបានបំផ្លាញអ្នកដើរឆ្លងកាត់ឬក្រុមអ្នកកាសែតត្រូវរងការគំរាមកំហែង ឬថា វិមាន Arc du Triomphe ត្រូវរងការខូចខាតយ៉ាងដំណំ។
អំពើហិង្សានេះបានបង្កឲ្យមានកង្វល់យ៉ាងខ្លាំងផងដែរនៅក្នុងសហគមន៍អាជីវកម្មបារាំងដែលបានធ្វើឲ្យមានការខាតបង់ថវិការាប់ពាន់លានអឺរ៉ូ៕