ក្រុងរ៉ាម៉ាឡាៈ ប្រធានាធិបតីប៉ាឡេស្ទីន លោក ម៉ាមុដ អាបាស បានហៅឯកអគ្គរដ្ឋទូតអាមេរិក ប្រចាំនៅ អុីស្រាអែល លោក David Friedman ថាជា «កូនប្រុសរបស់មេឆ្កែមួយក្បាល» កាលពីថ្ងៃចន្ទ នៅក្នុងអំឡុងការរិះគន់គោលនយោបាយរបស់ លោក ដូណាល់ ត្រាំ។
សម្តីរបស់លោក បានកើតឡើង ស្របពេលដែលប្រធានាធិបតីអាមេរិក លោក ដូណាល់ ត្រាំ នៅតែសង្ឃឹមថានឹងចាប់ផ្តើមផែនការ ដើម្បីសន្តិភាពរវាងអ៊ីស្រាអែល និង ប៉ាឡេស្ទីន ថ្វីបើលោកអាបាស បានពហិការរដ្ឋការរបស់លោក ជុំវិញរឿងដែលលោកទទួលស្គាល់ក្រុងហ្ស៊េរុយសាឡិម ជារដ្ឋធានីរបស់អ៊ីស្រាអែលនោះ។
លោក អាបាស បានថ្លែងពន្យល់ទៅកាន់ក្រុមមេដឹកនាំប៉ាឡេស្ទីន នៅក្នុងក្រុងរ៉ាម៉ាឡាថា៖ «ឯកអគ្គរដ្ឋទូតអាមេរិកនៅក្រុងតែលអាវីវ គឺជាអ្នកតាំងទីលំនៅម្នាក់ និង ជាមេកូនប្រុសរបស់មេឆ្កែមួយក្បាល»។
ការទំនាក់ទំនងរវាងរដ្ឋាភិបាលរបស់លោកអាបាស និងរដ្ឋការរបស់លោក ត្រាំ បានធ្លាក់ចុះយ៉ាងខ្លាំង ចាប់តាំងពីសេតវិមាន ទទួលស្គាល់ក្រុងហ្ស៊េរុយសាឡិម ជារដ្ឋធានីរបស់អុីស្រាអែល កាលពីខែធ្នូ ឆ្នាំ ២០១៧ មក៕ PSA