.jpg)
លោកប្រធានាធិបតីអាមេរិក ដូណាល់ ត្រាំ ថ្លែងទៅកាន់ក្រុមអ្នកសារព័ត៌មាននៅសេតវិមាន។ រូប Yonhap
ក្រុងសេអ៊ូលៈ លោកប្រធានាធិបតីអាមេរិក ដូណាល់ ត្រាំ បានថ្លែងថា មេដឹកនាំកូរ៉េខាងជើង គីម ជុងអ៊ុន ចង់បំផ្លាញចោលទីតាំងនុយក្លេអ៊ែរ ១ ឬ ២ នៅក្នុងចំណោមទីតាំងទាំង ៥ នៅក្នុងប្រទេសរបស់លោកក្នុងអំឡុងជំនួបនៅក្នុងក្រុងហាណូយ កាលពីខែកុម្ភៈ។
លោក ត្រាំ បានធ្វើការអធិប្បាយនៅក្នុងបទសម្ភាសមួយជាមួយសារព័ត៌មាន Fox News កាលពីថ្ងៃអាទិត្យដោយបានបង្ហាញពីការប្តេជ្ញាជាថ្មីថា មិនអនុញ្ញាតឲ្យប្រទេស អ៊ីរ៉ង់ មានអាវុធនុយក្លេអ៊ែរទេស្របពេលជាមួយនឹងភាពតានតឹងផ្នែកយោធាកាន់តែកើនកម្តៅជាមួយសាធារណរដ្ឋអ៊ិស្លាមនេះ។
លោក ត្រាំ បានថ្លែងថា៖ «នៅពេល ដែលខ្ញុំចាកចេញពីប្រទេស វៀតណាម ជាទីដែលខ្ញុំបានចូលរួមជំនួបនោះ ខ្ញុំបាននិយាយទៅកាន់លោកប្រធាន គីម ជុងអ៊ុន ហើយខ្ញុំគិតយ៉ាងច្បាស់ ហើយនិយាយថា លោកមិនទាន់បានត្រៀមខ្លួនសម្រាប់កិច្ចព្រមព្រៀងណាមួយ ដោយសារតែលោកចង់បំផ្លាញចោលតែទីតាំងនុយក្លេអ៊ែរ ១ ឬ ២ ប៉ុណ្ណោះ»។
មេដឹកនាំកូរ៉េខាងជើង លោក គីម ជុងអ៊ុន (ឆ្វេង) ជួបជាមួយនឹងលោក ប្រធានាធិបតីអាមេរិក ដូណាល់ ត្រាំ នៅក្រុងហាណូយ។ AFP
លោក បានបន្ថែមថា៖ «គាត់ (គីម ជុងអ៊ុន) មានទីតាំងនុយក្លេអ៊ែរចំនួន ៥ ខ្ញុំបាននិយាយថា ចុះ ៣ ទីតាំងទៀត»។
ជំនួបនៅក្រុងហាណូយ បានបរាជ័យ ដោយសារលោក ត្រាំ និង គីម ជុងអ៊ុន ខកខានមិនបានបំពេញភាពខ្វះចន្លោះរបស់ពួកគេជុំវិញលក្ខខណ្ឌនៃការលុបបំបាត់អាវុធនុយក្លេអ៊ែររបស់ក្រុងព្យុងយ៉ាង និងការកាត់បន្ថយទណ្ឌកម្មរបស់ក្រុងវ៉ាស៊ីនតោន។ ចាប់តាំងពីពេលនោះមក ការចរចាទ្វេភាគី ក៏បានជាប់គាំង។
ទោះជាយ៉ាងណា ក៏លោក ត្រាំ បញ្ជាក់ថា មិនទាន់មានការតេស្តនុយក្លេអ៊ែរ ឬមីស៊ីលចម្ងាយឆ្ងាយទេ៕ Yonhap/PSA
