.jpg)
រថយន្តយោធាដឹកមីស៊ីលនៅក្នុងអំឡុងក្បួនព្យុះយាត្រាប្រារព្ធខួបកងទ័ពនៅថ្ងៃទី១៨ ខែមេសា ២០១៨។ AFP
ក្រុងតេអេរ៉ង់ៈ ប្រធានាធិបតីអ៊ីរ៉ង់ លោក ហាសាន រ៉ូហានី កាលពីថ្ងៃពុធថា អ៊ីរ៉ាក់មិនមានបំណងឈ្លានពានប្រឆាំងនឹងអ្នកជិតខាងរបស់ខ្លួនទេ ប៉ុន្តែនឹងបន្តផលិតអាវុធទាំងអស់ ដែលខ្លួនត្រូវការ ដើម្បីការពារខ្លួន។
លោក រ៉ូហានី ថ្លែងនៅឯពិធីព្យុះហយាត្រាយោធានៅក្នុងក្រុង តេអេរ៉ង់ ដើម្បីប្រារព្ធទិវាកងទ័ពប្រចាំឆ្នាំថា៖«យើងសូមប្រាប់ពិភពលោកថា យើងនឹងផលិតអាវុធណាដែលយើងត្រូវការ ឬ ប្រសិនបើចាំបាច់នោះ យើងនឹងទិញអាវុធទាំងនោះ។ យើងមិនរង់ចាំទេ ហើយនឹងមិនរង់ចាំការពន្យល់ ឬក៏កិច្ចព្រមព្រៀងរបស់អ្នកទេ»។
«ប៉ុន្តែនៅពេលជាមួយគ្នានេះ យើងប្រកាសទៅកាន់បណ្តាប្រទេសជិតខាងរបស់យើងនៅក្នុងតំបន់ថា យើងមិនមានបំណងឈ្លានពានណាមួយប្រឆាំងនឹងអ្នកទេ»។
អាមេរិក នឹងសម្ព័ន្ធមិត្តរបស់ខ្លួន កំពុងទាមទារថា អុីរ៉ង់គួរតែកាត់បន្ថយកម្មវិធីមីស៊ីលបាលីស្ទិករបស់ខ្លួន ប៉ុន្តែអ៊ីរ៉ង់យល់ថា កម្មវិធីនេះ មានសារៈសំខាន់ណាស់ចំពោះកិច្ចការការពារជាតិរបស់ខ្លួន។
ប្រធានាធិបតីអាមេរិក លោក ដូណាល់ ត្រាំ បានគំរាមបំផ្លាញចោលកិច្ចព្រមព្រៀងនុយក្លេអ៊ែរ ឆ្នាំ ២០១៥ ដែលលុបចោលទណ្ឌកម្មទៅលើ អ៊ីរ៉ង់ ជាថ្នូរនឹងការកំណត់កម្មវិធីអាវុធបរិមាណូរបស់ខ្លួន ប្រសិនបើគ្មានការរឹតបន្តឹងថ្មី ត្រូវបានដាក់ទៅលើកម្មវីធីមីស៊ីលរបស់ អ៊ីរ៉ង់ និងផ្នែកដទៃទៀត ត្រឹមថ្ងៃទី ១២ ខែឧសភា នោះទេ៕ PSA
