ក្រុងបេរូត៖ ទីភ្នាក់ងារសារព័ត៌មានរដ្ឋសាណា បាននិយាយកាលពីព្រឹកថ្ងៃព្រហស្បតិ៍ថា ទ័ពការពារអាកាសស៊ីរីបានឆ្លើយតបទៅនឹង «ការវាយប្រហាររបស់អ៊ីស្រាអែល» នៅក្បែរក្រុងដាម៉ាស។
ទីភ្នាក់ងារសារព័ត៌មាននេះបានឲ្យដឹងទៀតថា៖ «ទ័ពអាកាសរបស់យើងបានប្រឈមមុខជាមួយការវាយ «ប្រហាររបស់អ៊ីស្រាអែល» នៅរដ្ឋធានីដាម៉ាសភាគខាងលិច ដោយបានបន្ថែមថា ការវាយប្រហារនោះបានធ្វើឡើងចេញពី «ដែនអាកាសរបស់ស៊ីរី»នៅតំបន់ហ្គូឡេន ហៃស៍ (Golan Hights)។
ទីភ្នាក់ងារសារព័ត៌មានសាណាបានបន្តថា៖ «ពួកគេមានសមត្ថភាពបានបាញ់ទម្លាក់មីស៊ីលរបស់សត្រូវអស់ជាច្រើនគ្រាប់ នៅមុនមីស៊ីលទាំងនោះហោះទៅគោលដៅ»។
ក្រុមអ្នកឆ្លើយឆ្លង AFP នៅក្នុងសង្កាត់មួយចំនួននៃទីក្រុងដាម៉ាស បានឮសំឡេងផ្ទុះយ៉ាងខ្លាំងនៅប្រហែលម៉ោង ១ និង ១៥ នាទីយប់។
ទូរទស្សន៍រដ្ឋបានបង្ហាញរូបភាពផ្ទុះនៅលើអាកាស។
សារព័ត៌មានសាណាបានបញ្ជាក់ថា ការវាយប្រហាររបស់អ៊ីស្រាអែល បានកំណត់គោលដៅទៅលើតំបន់អាល់-គីស្វាហ៍ ដែលបានកំណត់គោលដៅរួចមកហើយទៅលើតំបន់នោះ អស់ជាច្រើនលើកកាលពីពេលកន្លងទៅ ប៉ុន្តែបានវាយប្រហារទៅលើភូមិម៉ាច អាល់-សាល់តាន់ និងភូមិជីសរ៍ បាកដាដ ផងដែរ។
យោងតាមក្រុមឃ្លាំមើលសិទ្ធិមនុស្សស៊ីរីដែលបានថ្លែងថា ភ្លើងបានឆេះនៅក្នុងតំបន់មួយក្នុងចំណោមតំបន់ជាច្រើនហើយទីតាំងឈរជើងរបស់កងកម្លាំងរដ្ឋាភិបាល និងអ៊ីរ៉ង់យ៉ាងតិច ៣ កន្លែង បានរងការវាយប្រហារនៅទីនោះ៕ AFP/SK