ក្រុងអ៊ីស្លាមម៉ាបាដ៖ អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស បានថ្លែងកាលពីថ្ងៃអាទិត្យថា ការប្រែប្រួលអាកាសធាតុ បានបង្កឲ្យមានឧបសគ្គយ៉ាងធ្ងន់ធ្ងរបំផុតចំពោះស្ថិរភាព និងវិបុលភាពសកល និងបង្កើនឲ្យមានកិច្ចខិតខំប្រឹងប្រែងរួមបន្ថែមទៀត ដែលបានរៀបចំធ្វើឡើងដោយគ្រប់ប្រទេស និងគ្រប់សហគមន៍នៅក្នុងពិភពលោក គឺជារឿងចាំបាច់ដើម្បីដោះស្រាយជាមួយវិបត្តិមួយនេះ។
ដោយបានបង្កើតឲ្យមានកិច្ចពិភាក្សាពិសេសមួយស្តីពីការអភិវឌ្ឍចីរភាព និងការប្រែប្រួលអាកាសធាតុលោក អង់តូនីញ៉ូ ហ្គុយតឺរេស បានថ្លែងថា ការរំខានដោយការប្រែប្រួលអាកាសធាតុ បានបង្ហាញអំពីគ្រោះថ្នាក់នៅទូទាំងពិភពលោកយ៉ាងច្បាស់ក្រឡែតនៅក្នុងនោះមានសត្វកណ្តូប បានវាយប្រហារទៅលើប្រទេស ប៉ាគីស្ថាន និងបណ្តាប្រទេសមួយចំនួនផ្សេងទៀត កំពុងទទួលការឈឺចាប់នៅក្នុងហេតុការណ៍នោះ។ «កម្តៅជាសកល ក៏កំពុងកើនឡើងជាសកលផងដែរ»។
លោកបានថ្លែងថា៖ «ពិភពលោកនេះកម្ដៅកំពុងឆេះឡើង ប៉ុន្តែក្រុមអ្នកធ្វើការសម្រេចចិត្តជាច្រើន បានបន្តចំណាយពេលឥតប្រយោជន៍»ដោយបានបន្ថែមថា កម្លាំងចលករសកលសម្រាប់ការដោះស្រាយវិបត្តិប្រែប្រួលអាកាសធាតុនោះ បានជាប់គាំងចាប់តាំងពីមានកិច្ចព្រមព្រៀងក្រុងប៉ារីសនៅឆ្នាំ ២០១៥ មកម្ល៉េះ។
ប្រមុខអគ្គលេខាធិការអង្គការសហប្រជាជាតិបានថ្លែងថា៖ «ខ្ញុំពិតជាមានជំនឿថា យើងអាចដោះស្រាយបញ្ហានេះបាន»៕ Xinhua/SK