ក្រុងកាប៊ុលៈ ប្រមុខអង្គការណាតូ លោក JensStoltenberg បានថ្លែងកាលពីថ្ងៃអង្គារថា ឱកាសសម្រាប់អាហ្វហ្គានីស្ថានទទួលបានសន្តិភាព កាន់តែច្រើនជាងមុន ក្នុងរយៈពេលជាច្រើនឆ្នាំនេះ ខណៈដែលក្រុមតាលីបង់កំពុងបង្កើនការវាយប្រហារទៅលើកងកម្លាំងរបស់អាហ្វហ្គានីស្ថាន ដែលចំនួនស្លាប់និងរងរបួសកាន់តែកើនឡើង។
សម្តីរបស់លោក Stoltenberg បានកើតឡើងនៅក្រុងកាប៊ុលប៉ុន្មានម៉ោង ក្រោយពីក្រុមតាលីបង់ បានវាយសង្គ្រប់ចូលទៅកាន់ប៉ុស្តិ៍ទាហាននៅតំបន់ដាច់ស្រយាលមួយនៅភាគខាងលិចអាហ្វហ្គានីស្ថាន ដែលមន្ត្រីនៅក្នុងតំបន់បានថ្លែងថា ទាហានយ៉ាងតិច២០នាក់ បានស្លាប់។
លោក DadullahQaneh ជាសមាជិកក្រុមប្រឹក្សាខេត្តបានថ្លែងប្រាប់AFP ថា ទាហាន២០នាក់ផ្សេងទៀត បានបាត់ខ្លួន ក្រោយពីមានការឆ្មក់វាយប្រហារនៅពេលយប់នៅក្នុងស្រុកPusht Koh នៃខេត្តFarah ខណៈកម្លាំងអាហ្វហ្គានីស្ថាន បានខិតខំប្រឹងប្រែងវាយបកទៅលើក្រុមអ្នកបះបោរនៅទូទាំងប្រទេស។
ក្រុមតាលីបង់ បានអះអាងទទួលខុសត្រូវចំពោះការវាយប្រហារនោះ ដោយបាននិយាយថា ទាហានជាង២០នាក់ ត្រូវបានសម្លាប់ និងជនសកម្មប្រយុទ្ធរបស់ខ្លួន ៥នាក់ត្រូវបានចាប់ខ្លួន៕ SK