ក្រុងបាងកកៈ លោកនាយករដ្ឋមន្ត្រី ប្រាយុធ ចាន-អូចា បានស្នើសុំឲ្យប្រជាជនថៃមានការអត់ធ្មត់ជាមួយរដ្ឋាភិបាលថ្មីរបស់លោក ខណៈដែលរដ្ឋាភិបាលនេះ មិនទាន់មានអំណាចពិសេសទូលំទូលាយ ដូចអ្នកកាន់តំណែងនាយករដ្ឋមន្ត្រីកាលពី ៥ ឆ្នាំ មុននោះនៅឡើយទេ។
លោក ប្រាយុធ ចាន-អូចា ដែលកំពុងចាប់ផ្តើមកាន់តំណែងអាណត្តិទី២ របស់លោកជានាយករដ្ឋមន្ត្រីនោះបានថ្លែងថា ជាលទ្ធផល រដ្ឋាភិបាលនេះ អាចនឹងពន្លឿនក្នុងការដោះស្រាយបញ្ហានានា និងធ្វើការឆ្លើយតបទៅកាន់សាធារណជន ដែលត្រូវការជាចាំបាច់។
លោក ប្រាយុធ ចាន-អូចា បានថ្លែងកាលពីថ្ងៃចន្ទ ខណៈដែលលោកបានថ្លែងសុន្ទរកថា ដែលបានផ្សព្វផ្សាយនៅទូទាំងប្រទេសថា គឺត្រូវបញ្ចប់អាណត្តិរបស់រដ្ឋាភិបាលដែលបានបង្កើតឡើងដោយការធ្វើរដ្ឋប្រហារ និងក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ (NCPO) នោះ។
លោកឧត្តមសេនីយ៍ ប្រាយុធ បានថ្លែងថា គោលការណ៍ប្រជាធិបតេយ្យបច្ចុប្បន្នត្រូវបានបង្កើតឡើងទាំងស្រុងនៅក្នុងប្រទេស ក្រោយពីរដ្ឋសភាបានបោះឆ្នោត ហើយរដ្ឋាភិបាលថ្មី ក៏បានបង្កើតឡើង។
លោកបានបន្ថែមថា សិទ្ធិមនុស្ស និងសេរីភាពនឹងត្រូវការពារ ស្ថិតនៅក្រោមច្បាប់រដ្ឋធម្មនុញ្ញ និងបញ្ហាផ្សេងៗនឹងត្រូវបានដោះស្រាយ តាមរយៈដំណើរការប្រជាធិបតេយ្យជាជាងការប្រើអំណាចពិសេសណាមួយ។
លោក ប្រាយុធ ចាន-អូចា បានថ្លែងថា៖ «ទោះបីមធ្យោបាយនេះ អាចនឹងយឺតយ៉ាវក្នុងការឆ្លើយតបទៅនឹងសេចក្តីត្រូវការរបស់ក្រុមមនុស្សមួយចំនួនក្តី ក៏យើងមានគម្រោងឲ្យរឹតបន្តឹងច្បាប់កិច្ចការនយោបាយ និងថវិកា ហើយចាំបាច់ត្រូវស្តាប់ទស្សនៈខុសៗគ្នា ហើយរដ្ឋាភិបាលនេះ ត្រូវតែអនុវត្តតាមដំណើរការប្រជាធិបតេយ្យ»។
លោកបានថ្លែងថា៖ «គ្រប់ភាគីទាំងអស់ ត្រូវរៀនពីការអត់ធ្មត់ និងចៀសវាងជម្លោះគិតឲ្យបានវែងឆ្ងាយ និងត្រូវមានវិន័យ និងគោរពសំឡេងភាគច្រើន»។
លោកបានថ្លែងទៀតថា រដ្ឋាភិបាលថ្មីនេះ នឹងបន្តកាតព្វកិច្ចរបស់ខ្លួននៅក្នុងខែនេះ ក្រោយពីបានប្រកាសសេចក្តីថ្លែងការណ៍អំពីគោលនយោបាយនៅក្នុងសភាដែលតម្រូវដោយរដ្ឋធម្មនុញ្ញ។
លោកឧត្តមសេនីយ៍ ប្រាយុធ បានថ្លែងថា រដ្ឋាភិបាលថ្មីនេះនឹងបន្តវិធានការដោះស្រាយ បញ្ហានានាដូចជាសេដ្ឋកិច្ច តម្លៃកសិផល និងបញ្ហាសង្គមជាដើម៕ BKP/SK