បុរីញូវយ៉ក៖ ឯកអគ្គរដ្ឋទូតអង្គការសហប្រជាជាតិរបស់ប្រទេស ចិន បានថ្លែងកាលពីថ្ងៃពុធថា ប្រទេស ចិន បានដោះស្រាយជាមួយការផ្ទុះមេរោគកូរ៉ូណាប្រភេទថ្មី នៅក្នុងមធ្យោបាយ «ទទួលខុសត្រូវខ្ពស់» និងច្បាស់លាស់ ក្រោយពីមានការរិះគន់ថា អាជ្ញាធរប្រចាំតំបន់មិនបានពន្លឿនវិធានការឲ្យបានគ្រប់គ្រាន់ និងឆាប់រហ័សនោះ។
ចាប់តាំងពីមានការផ្ទុះមេរោគផ្លូវដង្ហើមរបស់ខ្លួន នៅកណ្តាលខេត្តហឺប៉ីកាលពីខែធ្នូ វីរុស COVID-19 បានបង្កឲ្យមនុស្សជាង ១ ៣៥០ នាក់ និងបានឆ្លងជិត ៦ ម៉ឺននាក់។
មានអ្នកឆ្លងវីរុសនេះជាង ៥០០ នាក់ នៅក្នុងប្រទេសជិត ៣០ និងនៅតាមទីក្រុងមួយចំនួនទៀត នៅក្រៅប្រទេស ចិនដីគោក នៅក្នុងនោះមាន ២ នាក់ទៀតបានស្លាប់។
ឯកអគ្គរដ្ឋទូតអង្គការសហប្រជាជាតិរបស់ប្រទេស ចិន លោក ហ្សាង ចុន បានថ្លែងប្រាប់គណៈកម្មការអង្គការសហប្រជាជាតិទទួលបន្ទុកការអភិវឌ្ឍពិសេសថា៖ «ការប្រឈមមុខជាមួយការឆ្លងរីករាលដាលមេរោគផ្លូវដង្ហើម ជានិច្ចកាលយើងបានបើក និងទទួលព្យាបាលអ្នកជំងឺ ដោយមានការទទួលខុសត្រូវខ្ពស់ និងច្បាស់លាស់»។
លោកបានថ្លែងថា៖ «យើងបានរាយការណ៍អំពីព័ត៌មានការឆ្លងរីករាលដាលនោះទៅកាន់អង្គការសុខភាពពិភពលោក WHO ក្រុមប្រទេសជាប់ពាក់ព័ន្ធ ហុងកុង ម៉ាកាវនិងតំបន់កោះតៃវ៉ាន់ យ៉ាងឆាប់រហ័សតាមដែលអាចទទួលយកបាន ហើយបានចែករំលែកព័ត៌មានអំពីការឆ្លងវីរុសនោះជាបន្តបន្ទាប់ ព្រមទាំងបានទំនាក់ទំនងយ៉ាងសកម្មជាមួយក្រុមប្រទេសផ្សេងទៀត ដើម្បីឆ្លើយតបឲ្យបានសមស្រប»។
មានករណីការឆ្លងមេរោគផ្លូវដង្ហើមច្រើនបំផុតនៅក្នុងខេត្តហឺប៉ី ជាទីដែលមនុស្សប្រហែល ៥៦ លាននាក់ ត្រូវបានគេដាក់ឲ្យនៅដាច់ដោយឡែកពីគេ។ អាជ្ញាធរបានរឹតត្បិតការធ្វើដំណើររបស់មនុស្ស នៅក្នុងទីក្រុងមួយចំនួនផ្សេងទៀត នៅឲ្យឆ្ងាយពីតំបន់នោះ ក្នុងកិច្ចខិតខំប្រឹងប្រែងទប់ស្កាត់មិនធ្លាប់មានពីមុន។
លោក ហ្សាង បានថ្លែងថា៖ «វាមិនមែនគ្រាប់តែដើម្បីផលប្រយោជន៍របស់ប្រទេស ចិន ប៉ុណ្ណោះនោះទេ ប៉ុន្តែដើម្បីពិភពលោកផងដែរ យើងបានចាត់វិធានការទប់ស្កាត់ និងគ្រប់គ្រងយ៉ាងម៉ឺងម៉ាត់បំផុត ដោយមានការបង្ការ និងការពារមិនឲ្យឆ្លងរីករាលដាលមេរោគផ្លូវដង្ហើមនេះយ៉ាងមានប្រសិទ្ធភាព»។
ចិនបានរងការថ្កោលទោស ពីអន្តរជាតិជុំវិញការបិទបាំងករណីជាច្រើននៅក្នុងការផ្ទុះមេរោគសារស៍ កាលពីឆ្នាំ ២០០២-២០០៣ ចំណែកឯអង្គការសុខភាពពិភពលោកវិញបានសរសើរចំពោះវិធានការដែលបានធ្វើឡើងដោយប្រទេស ចិន ក្នុងការប្រយុទ្ធប្រឆាំងមេរោគ COVID-19 ប្រភេទថ្មីនេះ៕ AFP/SK