ក្រុងទ្រីប៉ូលីៈ តួកគីបានថ្លែងកាលពីថ្ងៃអាទិត្យថា ពលរដ្ឋ ៦ នាក់ របស់ខ្លួន ត្រូវបានឃុំខ្លួនដោយកងកម្លាំងដឹកនាំដោយលោក Khalifa Haftar ខណៈកងកម្លាំងរបស់បុរសខ្លាំងលីប៊ីបានថ្លែងថា ពួកគេបានបាញ់ទម្លាក់យន្តហោះដ្រូនតួកគីនៅក្រុងទ្រីប៉ូលី។
លោក Haftar បានចេញបញ្ជាឲ្យវាយប្រហារទៅលើផលប្រយោជន៍របស់តួកគី ក្រោយពីលោកបានបាត់បង់ទីក្រុងសំខាន់ ១ ទៅឲ្យកងកម្លាំងគាំទ្ររដ្ឋាភិបាលទទួលស្គាល់ដោយអន្តរជាតិរបស់លីប៊ី និងមានការគាំទ្រដោយក្រុងអង់ការ៉ាផងនោះ។
ក្រសួងការបរទេសតួកគីបានថ្លែងកាលពីថ្ងៃអាទិត្យថា «ការឃុំខ្លួនពលរដ្ឋរបស់យើង ៦ នាក់ ដោយកងកម្លាំងសកម្មប្រយុទ្ធខុសច្បាប់ ដែលមានទំនាក់ទំនងជាមួយនឹងលោក Haftar ជាទង្វើនៃការប្រព្រឹត្តបទឧក្រិដ្ឋ និងចោរកម្ម»។
នៅក្នុងសេចក្តីថ្លែងការណ៍មួយ ក្រសួងការបរទេស បានថ្លែងថា៖ «យើងសង្ឃឹមថា ក្រុមពលរដ្ឋរបស់យើង នឹងត្រូវបានដោះលែងជាបន្ទាន់»។
«ប្រសិនបើបញ្ហានេះ មិនបានកើតឡើងនោះ កងកម្លាំងរបស់លោក Haftar នឹងក្លាយទៅជាគោលដៅវាយប្រហារស្របច្បាប់»។
ក្រសួងការបរទេស មិនបានផ្តល់ព័ត៌មានលម្អិតទៅលើកន្លែងដែលពលរដ្ឋតួកគីត្រូវបានឃុំខ្លួន ឬថា តើពួកគេត្រូវបានគេឃុំខ្លួននៅពេលណានោះទេ ហើយប្រភពក្រសួងការបរទេសបានថ្លែងប្រាប់ AFP ថា «មិនមានព័ត៌មានបន្ថែមត្រូវផ្តល់ជូននៅពេលនេះនៅឡើយទេ»។
កងកម្លាំងលោក Haftar ដែលបានគ្រប់គ្រងទឹកដីយ៉ាងច្រើននៅលីប៊ីភាគខាងកើត និងខាងត្បូង បានបើកការវាយប្រហារទ្រង់ទ្រាយធំ កាលពីដើមខែមេសា ដើម្បីដណ្តើមកាន់កាប់យកទីក្រុងពីរដ្ឋាភិបាលបង្រួបបង្រួមជាតិទទួលស្គាល់ដោយអន្តរជាតិ។
ភាគីទាំង ២ បានចោទប្រកាន់គ្នាទៅវិញទៅមក ពីបទទទួលយកការគាំទ្រពីក្រុមមហាអំណាចក្រៅប្រទេស។
អ្នកនាំពាក្យរបស់លោក បានថ្លែងកាលពីថ្ងៃសុក្រថា បន្ទាប់ពីលោក Haftar បានបាត់បង់ទីក្រុងយុទ្ធសាស្ត្រ Gharyan ទៅឲ្យកងកម្លាំងគាំទ្ររដ្ឋាភិបាលបង្រួបបង្រួមជាតិនៅក្នុងប្រតិបត្តិការមួយ ដែលលោកបានចោទប្រកាន់ក្រុងអង់ការ៉ា ពីបទគាំទ្ររដ្ឋាភិបាលបង្រួបបង្រួមជាតិនោះ លោកបានចេញបញ្ជាឲ្យកងកម្លាំងរបស់លោកយកក្រុមហ៊ុនតួកគីជា គោលដៅ ដោយបើកការវាយប្រហារ និងចាប់ខ្លួនពលរដ្ឋតួកគីនៅលីប៊ី។
កាលពីថ្ងៃអាទិត្យ កងកម្លាំងលោកបានថ្លែងថា ពួកគេបានកម្ទេចយន្តហោះរបស់ប្រទេស តួកគី ១ គ្រឿង នៅក្នុងការវាយប្រហារទៅលើព្រលានយន្តហោះ ១ កន្លែង នៅក្នុងទីក្រុងទ្រីប៉ូលី។
កងកម្លាំងជាតិលីប៊ីគ្រប់គ្រងដោយលោក Haftar បានថ្លែងនៅក្នុងសេចក្តីថ្លែងការណ៍នៅលើបណ្តាញសង្គមហ្វេសប៊ុកថា៖ «យន្តហោះចម្បាំងរបស់យើងបានកំណត់គោលដៅ និងបានបាញ់ទម្លាក់យន្តហោះចម្បាំង Bayraktar របស់តួកគី ១ គ្រឿង ខណៈដែលយន្តហោះទាំងនោះ កំពុងតែហោះចេញពីព្រលានយន្តហោះ Mitiga៕ AFP/SK