ក្រុងហាណូយៈ មេធាវីនិងប្រព័ន្ធផ្សព្វផ្សាយរដ្ឋបានឲ្យដឹងថា ពលរដ្ឋអាមេរិកម្នាក់កាលពីថ្ងៃចន្ទ ត្រូវបានកាត់ទោសឲ្យជាប់ពន្ធនាគារវៀតណាមរយៈពេល ១២ ឆ្នាំ ពីបទប៉ុនប៉ងផ្តួលរំលំរដ្ឋ ខណៈប្រទេសឯកបក្សមួយនេះ ព្យាយាមបំបិទសំឡេងប្រឆាំងនោះ។
ពលរដ្ឋអាមេរិកដើមកំណើតវៀតណាមឈ្មោះ Michael Nguyen ត្រូវបានគេចាប់ឃុំខ្លួន កាលពីខែកក្កដា ឆ្នាំទៅ ខណៈធ្វើដំណើរចូលទៅក្នុងប្រទេសនេះ ជាមួយសកម្មជន ២ នាក់ ដែលត្រូវបានគេចាប់ខ្លួនដែរនោះ។
យោងតាមវេបសាយ VnExpressគ្រប់គ្រងដោយរដ្ឋបានឲ្យដឹងថា ពួកគេទាំង ៣ នាក់ ត្រូវរងការចោទពីបទបង្កើតក្រុមមួយ ដើម្បីរៀបចំការតវ៉ា និងកាន់កាប់ស្នាក់ការផ្លូវការនៅក្នុងក្រុងហាណូយ និងក្រុងហូជីមិញ។
មេធាវីម្នាក់នៅក្នុងក្រុមបាននិយាយថា លោក ត្រូវបានផ្តន្ទាទោសឲ្យជាប់ពន្ធនាគារ ១២ ឆ្នាំ នៅក្នុងការកាត់ទោសកន្លះថ្ងៃនៅក្នុងតុលាការក្រុងហូជីមិញ និងត្រូវបញ្ជាឲ្យចាកចេញពីប្រទេសនេះ ក្រោយពីអនុវត្តទោសរបស់គេចប់។
សកម្មជន ២ នាក់ទៀត ដែលត្រូវបានចាប់ខ្លួនជាមួយរូបគេគឺមានឈ្មោះ Tran Long Phi និងឈ្មោះ Duc Thanh Binh ត្រូវបានកាត់ទោសឲ្យជាប់គុក ៨ ឆ្នាំ និង ១០ ឆ្នាំ ក្រោមបទចោទប្រកាន់ដូចគ្នានោះ។
លោកមេធាវី Nguyen Van Mieng បានថ្លែងថា ទោសសម្រាប់ជនជាប់ចោទ ធ្ងន់ធ្ងរពេកណាស់។
ប្រព័ន្ធផ្សព្វផ្សាយរដ្ឋ បានឲ្យដឹងថាប៉ូលិស កំពុងតាមចាប់ខ្លួនបុរសវៀតណាមម្នាក់ទៀត៕ AFP/PSA