ក្រុងប៊ីឡូ ហូរីហ្សូនទី៖ អាជ្ញាធរបានថ្លែងកាលពីថ្ងៃអាទិត្យថា ចំនួនអ្នកស្លាប់ដោយសារព្យុះ និងទឹកជំនន់យ៉ាងខ្លាំងក្នុងរយៈពេលប៉ុន្មានថ្ងៃមកនេះ នៅក្នុងប្រទេស ប្រេស៊ីលភាគអាគ្នេយ៍ បានកើនឡើងដល់ ៤៤ នាក់ហើយ។
ក្រុមមន្ត្រីការពារជនស៊ីវិលក្នុងតំបន់បានថ្លែងថា បន្ថែមពីលើអ្នកស្លាប់នោះ ចំនួនអ្នករងរបួសមាន ១២ នាក់ ហើយដែលចំនួនអ្នកកំពុងបាត់ខ្លួន ថយចុះពី ២៥ នាក់មក ១៩ នាក់។
អ្នកស្លាប់នៅមិនទាន់បានកំណត់អត្តសញ្ញាណនៅឡើយ ហើយសាកសពជាច្រើនត្រូវបានកប់ដោយការបាក់ដី ឬនៅក្នុងគំនរបាក់បែកនៃផ្ទះបាក់រលំ ដែលក្រុមអ្នកក្រប្រេស៊ីលជាច្រើន បានសាងសង់ខ្វះគុណភាពនៅទីនោះ។
ក្រុមមន្ត្រីបានថ្លែងថា មនុស្សប្រហែល ១៧ ០០០ នាក់ ត្រូវបានបង្ខំចិត្តចាកចេញពីផ្ទះរបស់ពួកគេ នៅក្នុងសង្កាត់ ៥៨ និងទីក្រុងមួយចំនួននៅទូទាំងរដ្ឋមីណាស់ ហ្គារ៉ៃស៍ នៅក្នុងនោះមាននៅក្នុងរដ្ឋធានីប៊ីឡូ ហូរីហ្សូនទី និងនៅជិតតំបន់មួយចំនួនទៀត មនុស្សជាង ១០ ០០០ នាក់ បានរត់ភៀសខ្លួនទៅកាន់រដ្ឋក្បែរខាង ២ ផ្សេងទៀត។
រូបភាពបានថតពីដី និងអាកាស ខ្លះបានបង្ហោះនៅលើប្រព័ន្ធផ្សព្វផ្សាយសង្គមបានបង្ហាញអំពីគ្រោះមហន្តរាយបានបោសសម្អាតផ្ទៃដីយ៉ាងធំល្វឹងល្វើយ ដោយបានធ្វើឲ្យខូចខាតផ្ទះអស់ជាច្រើនខ្នង ដើមឈើ និងបង្គោលភ្លើងជាច្រើនបានបាក់រលំរាបដល់ដី ទឹកទន្លេហូរយ៉ាងខ្លាំង ស្ពានជាច្រើនកន្លែង បានបាក់ចូលក្នុងទឹកទន្លេ ហើយបានជន់លិចនៅតាមតំបន់ក្បែរខាងមួយចំនួន។
ភ្លៀងបានធ្លាក់យ៉ាងខ្លាំង ដែលជាស្ថានការណ៍ដ៏អាក្រក់បំផុតចាប់តាំងពីបានចុះក្នុងកំណត់ត្រាដំបូងក្នុងរយៈពេល ១១០ ឆ្នាំ៕ AFP/SK