ក្រុងសាលប៊ឺកៈ ក្រុមមេដឹកនាំសហភាពអឺរ៉ុប (EU) កាលពីថ្ងៃព្រហស្បតិ៍ បានត្រៀមចរចាអំពីការចាកចេញរបស់អង់គ្លេស ក្រោយពីប៉ះទង្គិចជាមួយអង់គ្លេសជុំវិញរបៀបធ្វើឲ្យមានការឯកភាពគ្នាដើម្បីឈានដល់កិច្ចព្រមព្រៀងចាកចេញមួយ។
ក្រុមមេដឹកនាំនៃប្រទេសសហភាពអឺរ៉ុបចំនួន ២៧ នឹងជួបគ្នាដោយគ្មានវត្តមាននាយករដ្ឋមន្ត្រីអង់គ្លេសលោកស្រីថេរ៉េសា ម៉េ នៅក្នុងក្រុងសាលប៊ឺកនៅក្នុងអំឡុងជំនួប ៣ ដំបូងនៅក្នុងរយៈពេលប៉ុន្មានខែជាប់គ្នាដែលក្រុងប្រ៊ុចសែល សង្ឃឹមថា នឹងឈានដល់កិច្ចព្រមព្រៀងមួយ។
ប៉ុន្តែខណៈពួកគេបានមកដល់ ដើម្បីចូលរួមញ៉ាំអាហារពេលល្ងាច នៅមុនជំនួបនៅល្ងាចថ្ងៃពុធ ភាគីទាំង ២ បានអំពាវនាវឲ្យអ្នកដទៃផ្តល់សម្បទានថែមទៀត។
ប្រធានក្រុមប្រឹក្សា EU លោក Donald Tusk បានថ្លែងថា ថ្វីបើមានការរីកចម្រើននៅក្នុងវិស័យខ្លះចំពោះបញ្ហាសំខាន់បំផុត ២ គឺព្រំដែនអៀរឡង់ និងចំណងទំនាក់ទំនងពាណិជ្ជកម្ម ក្រោយអង់គេ្លសចាកចេញពី EU សំណើរបស់អង់គ្លេសនឹងចាំបាច់ត្រូវធ្វើជាថ្មី។
លោកស្រីម៉េ ដែលកំពុងរងសម្ពាធយ៉ាងខ្លាំងពីក្រុមអ្នកគាំទ្រឲ្យចាកចេញពីសហភាពអឺរ៉ុបនៅក្នុងប្រទេស បានរាយការណ៍ថា លោកស្រី បានសម្របសម្រួលរួចហើយ និងឥឡូវនេះវា គឺជាវេនរបស់ក្រុងប្រ៊ុចសែលហើយ។
លោកស្រី បានថ្លែងថា៖ «ប្រសិនបើយើងបានឈានដល់ការសន្និដ្ឋានប្រកបដោយជោគជ័យនោះ អង់គ្លេសបានផ្លាស់ប្តូរគោលជំហររបស់ខ្លួន ហើយ EU ចាំបាច់ត្រូវផ្លាស់ប្តូរគោលជំហររបស់ខ្លួនដែរ»។
ភាគីទាំង ២ មានបំណងឲ្យជំនួប EU នៅខែតុលាក្លាយជាពេលវេលាកំណត់ដើម្បីឈានដល់កិច្ចព្រមព្រៀងមួយក្នុង គោលបំណងផ្តល់ពេលឲ្យកិច្ចព្រមព្រៀងនោះត្រូវបានអនុម័តដោយសភាអង់គ្លេស និងអឺរ៉ុប មុនចាកចេញពី EU នៅក្នុងខែមីនា។
ប៉ុន្តែដោយសារការចរចាជាប់គាំង លោក Tusk កំពុងស្វះស្វែងរកការព្រមព្រៀងឲ្យមានជំនួបមួយទៀតនៅខែវិច្ឆិកាដើម្បីបង្វែរគ្រោះមហន្តរាយរបស់អង់គ្លេសចេញពីប្លុកនេះ៕