.jpg)
ក្រុមអ្នកភូមិធ្វើដំណើរដោយជិះទូកនៅក្នុងភូមិ Jhargoan ដែលប៉ះពាល់ដោយ ទឹកជំនន់នៅក្នុងស្រុក Morigaon នៃរដ្ឋអាសាមរបស់ប្រទេស ឥណ្ឌា។ AFP
ក្រុងញូវដែលីៈ ក្រុមមន្ត្រីបាននិយាយកាលពីថ្ងៃអង្គារថា ភ្លៀងរដូវវស្សាធ្លាក់ខ្លាំង បង្កឲ្យមានទឹកជំនន់ និងបាក់ដីនៅទូទាំងអាស៊ីខាងត្បូង ដោយបានធ្វើឲ្យប៉ះពាល់មនុស្សរាប់លាននាក់ និងបណ្តាលឲ្យមនុស្សយ៉ាងតិច ១៨០ នាក់ស្លាប់។
ភ្លៀងរដូវវស្សាមានសារៈសំខាន់សម្រាប់ការស្រោចស្រព និងផ្គត់ផ្គង់ទឹកនៅក្នុងតំបន់ក្រីក្រ ជាទីកន្លែងដែលមានប្រជាជនច្រើនទី ៥ នៅក្នុងពិភពលោកនេះ។
ប៉ុន្តែភ្លៀងធ្លាក់ខ្លាំងដែលចាប់ផ្តើមពីខែមិថុនា រហូតដល់ខែកញ្ញា អាចបង្កឲ្យមនុស្សស្លាប់ និងបណ្តាលឲ្យមានមហន្តរាយធ្ងន់ធ្ងរជាថ្មីម្តងទៀតក្នុងឆ្នាំនេះនៅប្រទេស ឥណ្ឌា នេប៉ាល់ បង់ក្លាដែស និងតំបន់កាស្មៀរគ្រប់គ្រងដោយប៉ាគីស្ថាន ដោយប្រជាជន ផ្ទះសំបែង និងទូកជាច្រើនគ្រឿងនៅក្នុងតំបន់វាលទំនាបត្រូវទឹកជំនន់ហូរអូសទៅបាត់គ្មានសល់។
នៅក្នុងប្រទេស បង់ក្លាដែស មនុស្សយ៉ាងតិច ៣៤ នាក់ បានស្លាប់កាលពីសប្តាហ៍មុន នៅក្នុងនោះមាន ១៨ នាក់ បានស្លាប់ដោយសាររន្ទះបាញ់ និង ៧ នាក់ផ្សេងទៀត ដែលបានលង់ទឹកស្លាប់បន្ទាប់ពីទូករបស់ពួកគេបានក្រឡាប់ដោយសារទឹករលកនៅឈូងសមុទ្រប៊ែងហ្គាល់។
នៅប្រទេស នេប៉ាល់ មនុស្សយ៉ាងតិច ៦៧ នាក់ បានស្លាប់ដោយសារទឹកជំនន់៕ AFP/SK
