ក្រុងម៉ានីល៖ ក្រុមមន្ត្រីបានថ្លែងកាលពីថ្ងៃចន្ទថា មនុស្សជិត ៥ ម៉ឺននាក់ ដែលកំពុងរស់នៅក្បែរភ្នំភ្លើងមួយ នៅលើកោះមួយដែលនៅជិតរដ្ឋធានីប្រទេស ហ្វីលីពីន បានយកចិត្តទុកដាក់ចំពោះការព្រមានជាផ្លូវការ ដើម្បីជម្លៀសចេញពីទីនោះ ខណៈការព្រួយបារម្ភអំពីការផ្ទុះភ្នំភ្លើងបានកើនឡើងយ៉ាងខ្លាំងនោះ។
វិទ្យាស្ថានភ្នំភ្លើងវិទ្យា និងធរណីវិទ្យាហ្វីលីពីនបានបង្កើនកម្រិតប្រកាសអាសន្នអំពីភ្នំភ្លើងតាអាល់ នៅក្នុងទីក្រុងតាលីសៃ ក្នុងខេត្តបាតតាងហ្គាស់ដែលមានចម្ងាយប្រហែល ៦៦ គីឡូម៉ែត្រ នៅភាគខាងត្បូងពីទីក្រុងម៉ានីល កាលពីថ្ងៃអាទិត្យបានកើនចាប់ពី ៤ ដល់កម្រិត ៥ ដោយបានបង្ហាញអំពីទិដ្ឋភាពកើនឡើង នៃការផ្ទុះប្រកបដោយគ្រោះថ្នាក់ «អស់រយៈពេល ប៉ុន្មានម៉ោងកាលពីថ្ងៃអាទិត្យ»។
កម្រិត ៤ មានន័យថា ជាការផ្ទុះប្រកបដោយគ្រោះថ្នាក់បំផុតកំពុងដំណើរការ។ វិទ្យាស្ថានភ្នំភ្លើងវិទ្យាបានប្រកាសអំពីតំបន់គ្រោះថ្នាក់ជាអចិន្រ្តៃយ៍នៅក្នុងទំហំ ១៤ គីឡូម៉ែត្រ របស់ភ្នំភ្លើងនៅក្នុងទីក្រុងតាអាល់ ខណៈភ្នំភ្លើងបានព្រួសកម្អែ និងផេះឡើងទៅលើអាកាស។
ប្រធានវិទ្យាស្ថានភ្នំភ្លើងលោក រីណាតូ សូលីដាំ បានថ្លែងថា ភ្នំភ្លើងរកកលនឹងព្រួសកម្អែអណ្តាតភ្លើងយ៉ាងក្តៅ និងផេះយ៉ាងច្រើនសន្ធឹកបន្ធាប់ហូរចេញមកក្រៅ នៅមុនវាចាប់ផ្តើមផ្ទុះកាលពីថ្ងៃចន្ទ។
លោកបានថ្លែងថា វិទ្យាស្ថានភ្នំភ្លើងបានកត់កំណត់ត្រាសរុបនៃកម្រិតរញ្ជួយផែនដីភ្នំភ្លើងចំនួន ៥២ នៅក្នុងតំបន់ទីក្រុងតាអាល់ នៅម៉ោង ១២ និង ៤៩ នាទីកាលពីថ្ងៃចន្ទ។
លោក សូលីដាំ បានថ្លែងថា៖ «សកម្មភាពកម្រិតញ័ររញ្ជួយយ៉ាងខ្លាំងក្លាជាបន្តប្រាប់ឲ្យដឹងអំពីសិលាម៉ាក់ម៉ាញ័រកក្រើក នៅខាងក្រោមអគារនៅក្នុងទីក្រុងតាអាល់ ដែលអាចនឹងឈានទៅរកឲ្យមានសកម្មភាពផ្ទុះភ្នំភ្លើងបន្ថែមទៀត»។
ចៅហ្វាយក្រុងលោក ហ្គឺររី ណាតានួន នៃទីក្រុងតាលីសៃ នៅក្នុងខេត្តបាតតាងហ្គាស់ បានថ្លែងថា មនុស្ស ៤៥ ០០០ នាក់ ដែលកំពុងរស់នៅជិតភ្នំភ្លើងតាអាល់ជាកន្លែងមួយដ៏មានប្រជាប្រិយភាពសម្រាប់ភ្ញៀវទេសចរដើរកម្សាន្ត ត្រូវបានគេជម្លៀសកាលពីយប់ថ្ងៃអាទិត្យ។ លោកបានថ្លែងទៀតថា អ្នកភូមិ ២ ឬ ៣នាក់ ដែលបានស្នាក់នៅទីនោះ ដើម្បីយាមផ្ទះរបស់ពួកគេនៅទីបញ្ចប់ត្រូវបានគេបង្ខំឲ្យជម្លៀសខ្លួនចេញពីទីនោះ ដើម្បីគេចពីគ្រោះថ្នាក់៕ Xinhua/SK