ក្រុងវ៉ាស៊ីនតោន៖ ក្រសួងការពារជាតិអាមេរិក បានថ្លែងកាលពីថ្ងៃអង្គារថា ខ្លួននឹងដាក់ពង្រាយទាហាន ៥ ៥០០ នាក់ នៅតាមព្រំដែនប្រទេស ម៉ិកស៊ិក នៅឆ្នាំ ២០២០ ខាងមុខនេះ ដើម្បីជួយទប់ស្កាត់អន្តោប្រវេសន៍ខុសច្បាប់។
អស់រយៈពេលមួយសប្តាហ៍ ក្រោយពីបានប្រកាសថា ខ្លួននឹងបង្វែរប្រាក់ចំនួន ៣,៦ ពាន់លានដុល្លារ ជាជំនួយសម្រាប់ការសាងសង់ជញ្ជាំងប្រឆាំងជនអន្តោប្រវេសន៍នៅតាមព្រំដែននោះ មន្ទីរបញ្ចកោណបានថ្លែងថា ខ្លួនបានអនុម័តសំណើមួយចេញពីក្រសួងសន្តិសុខជាតិ ដើម្បីរក្សាវត្តមានកងកម្លាំងឲ្យនៅទីនោះ។
អ្នកនាំពាក្យមន្ទីរបញ្ចកោណលោកវរសេនីយ៍ទោ Chris Mitchell បានថ្លែងថា ក្រសួងការពារជាតិ «នឹងផ្តល់ទាហាន ៥ ៥០០ នាក់ ដើម្បីផ្តល់ការគាំទ្រហេដ្ឋារចនាសម្ព័ន្ធ គាំទ្រប្រតិបត្តិការការស៊ើបអង្កេតត្រួតពិនិត្យ និងគាំទ្រផ្លូវអាកាស»។
ការបង្កើនវត្តមានយោធានៅខាងព្រំដែនអាមេរិកនោះ កើតឡើងក្រោយពីម៊ិកស៊ិកបង្កើនការដាក់ពង្រាយទាហានរបស់ខ្លួនយ៉ាងច្រើន បន្ទាប់ពីមានសម្ពាធពីប្រធានាធិបតី ដូណាល់ ត្រាំ នៅក្នុងនោះមានការគំរាមដាក់ទណ្ឌកម្មពាណិជ្ជកម្មទៅលើប្រទេស ម៉ិកស៊ិក ទៀតផង។
សេតវិមានបានថ្លែងថា លោកអនុប្រធានាធិបតីលោក ម៉ៃក៍ ផែនស៍ កាលពីថ្ងៃអង្គារ បានជួបជាមួយរដ្ឋមន្ត្រីការបរទេសម៉ិកស៊ិក គឺលោក Marcelo Ebrard នៅក្រុងវ៉ាស៊ីនតោនហើយ «បានទទួលស្គាល់រដ្ឋាភិបាលអំពីវិធានការ ដែលមិនធ្លាប់មានពីមុន និងមានសារៈសំខាន់របស់ម៉ិកស៊ិកក្នុងការជួយទប់ស្កាត់លំហូរចូលនៃអន្តោប្រវេសន៍ខុសច្បាប់»។
សេចក្តីថ្លែងការណ៍នោះ បានលើកឡើងពីការទាមទាររបស់ក្រុមមន្ត្រី US ឲ្យម៉ិកស៊ិក បង្កើនការបង្ក្រាបការឆ្លងព្រំដែន៕ AFP/SK