.jpg)
លោកស្រី អ៊ុងសាន ស៊ូជី (ឆ្វេង) និងលោកឧត្តមសេនីយ៍ Min AungHlaing នៅក្នុងចំណោមក្រុមមន្ត្រីកំពូលៗកំពុងរងការចោទប្រកាន់។ AFP
ក្រុងយ៉ាំងហ្គោន៖ រដ្ឋាភិបាលប្រទេស មីយ៉ាន់ម៉ា បានប្រតិកម្មកាលពីថ្ងៃសុក្រ ក្រោយពីសម្ពាធតាមផ្លូវច្បាប់ជាសកលកាន់តែកើនឡើង ជុំវិញការចោទប្រកាន់ពីបទឧក្រិដ្ឋកម្មរបស់ខ្លួនប្រឆាំងជនរ៉ូហ៊ីងយ៉ា ដោយបានចាត់ទុកការស៊ើបអង្កតមួយរបស់តុលាការឧក្រិដ្ឋកម្មអន្តរជាតិ (ICC) នោះ «មិនស្របទៅតាមច្បាប់អន្តរជាតិទេ»។
កាលពីថ្ងៃព្រហស្បតិ៍ ICC បានអនុម័តឲ្យមានការស៊ើបអង្កេតពេញលេញមួយ ទៅលើការបង្ក្រាបដោយយោធាយ៉ាងបង្ហូរឈាម កាលពីឆ្នាំ ២០១៧ ប្រឆាំងក្រុមមូស្លីមភាគតិចនៅប្រទេស មីយ៉ាន់ម៉ា។
ការសម្រេចចិត្តនោះបានធ្វើឡើងក្រោយពីក្រុមអង្គការសិទ្ធិមនុស្ស បានដាក់ពាក្យបណ្តឹងដាច់ដោយឡែកមួយនៅក្នុងប្រទេស អាហ្សង់ទីន ដែលអតីតនិមិត្តរូបប្រជាធិបតេយ្យលោកស្រី អ៊ុងសាន ស៊ូជី ត្រូវបានគេតែងតាំងដោយផ្ទាល់នោះ ហើយជាសំណើមួយបន្ថែមទៀតអំពីករណីអំពើប្រល័យពូជសាសន៍មួយ នៅតុលាការកំពូលរបស់អង្គការសហប្រជាជាតិ។
អស់រយៈពេល ២ ឆ្នាំមកហើយ ជនរ៉ូហ៊ីងយ៉ាប្រហែល ៧៤ ម៉ឺននាក់ បានរត់ភៀសខ្លួននៅតាមព្រំដែនចូលទៅក្នុងជំរំមានហ្វូងមនុស្សរស់នៅយ៉ាងច្រើនណែនណាន់តាន់តាប់ នៅក្នុងប្រទេស បង់ក្លាដែស នៅក្នុងអំពើហិង្សាដែលក្រុមអ្នកស៊ើបអង្កតរបស់អង្គការសហប្រជាជាតិ បានហៅថាជាអំពើឧក្រិដ្ឋកម្មប្រល័យពូជសាសន៍នៅមីយ៉ាន់ម៉ា។
ប្រទេស មីយ៉ាន់ម៉ា បាននិយាយការពារខ្លួនម្តងហើយម្តងទៀត អំពីការបង្ក្រាបនោះថា វាជារឿងចាំបាច់ដែលរដ្ឋាភិបាលត្រូវកម្ទេចក្រុមយុទ្ធជនសកម្មប្រយុទ្ធ ហើយបានបដិសេធមិនទទួលស្គាល់អាជ្ញាធររបស់តុលាការ ICC ជាយូរមកហើយ ដែលខ្លួនបានប្រឆាំងម្តងហើយម្តងទៀតកាលពីថ្ងៃសុក្រ៕ AFP/SK
