ក្រុងសេអ៊ូលៈ ប្រធានាធិបតីកូរ៉េខាងត្បូងលោកមូន ជេអ៊ីនកាលពីថ្ងៃអង្គារ បានអំពាវនាវឲ្យប្រធានាធិបតីដូណាល់ ត្រាំនិងមេដឹកនាំកូរ៉េខាងជើងគីម ជុងអ៊ុនធ្វើ «ការសម្រេចចិត្តយ៉ាងមុតមាំមួយ» ក្នុងការលុបបំបាត់អាវុធនុយក្លេអ៊ែរ ខណៈដែលសេតវិមាន បានឲ្យដឹងថាខ្លួនបានកំពុងតែគ្រោងរៀបចំកិច្ចប្រជុំមួយទៀតជាមួយក្រុងព្យុងយ៉ាង។
លោកមូនបានថ្លែងថា៖ «ការលុបបំបាត់អាវុធនុយក្លេអ៊ែរទាំងស្រុងចេញពីឧបទ្វីបកូរ៉េគឺជាសំណុំរឿងមួយដែលគួរតែត្រូវបានដោះស្រាយ ដោយអាមេរិក និងកូរ៉េខាងជើងតាមរយៈការចរចា»។
លោកបានថ្លែងថា៖ «ប៉ុន្តែទាល់តែកិច្ចពិភាក្សា និងទំនាក់ទំនងរវាងកូរ៉េខាងជើង និងអាមេរិកមានភាពសកម្មជាងមុន យើងមិនអាចធ្វើអ្វីបានក្រៅពីជួយសម្របសម្រួលពួកគេនោះទេ»។
លោកបានបន្ថែមថា៖ «លោកប្រធានាធិបតីត្រាំនិងមេដឹកនាំ គីម ជុងអ៊ុន បានស្នើឲ្យខ្ញុំដើរតួជាអ្នកសម្របសម្រួលនេះ»។
សម្តីរបស់លោកបានកើតឡើង បន្ទាប់ពីសេតវិមានថ្លែងថា ខ្លួនកំពុងតែស្ថិតនៅដំណើរការរៀបចំកិច្ចប្រជុំរវាងលោកត្រាំ និងលោកគីម ជុងអ៊ុន ក្រោយពេលក្រុងព្យុងយ៉ាងបានស្នើឲ្យមានកិច្ចប្រជុំជាលើកទី ២ នៅក្នុងសំបុត្រមួយផ្ញើទៅកាន់លោកត្រាំ។
លោកមូន ជេអ៊ីន ដែលជាអ្នកសម្របសម្រួលកិច្ចប្រជុំកាលពីខែមិថុនាក្នុងប្រទេសសិង្ហបុរីរវាងលោកត្រាំ និងលោកគីម ជុងអ៊ុន នឹងហោះហើរទៅកាន់ក្រុងព្យុងយ៉ាងនៅសប្ដាហ៍ក្រោយដើម្បីចូលរួមកិច្ចប្រជុំលើកទី ៣ ជាមួយលោកគីម ជុងអ៊ុន នៅក្នុងឆ្នាំនេះ។
លោកបានថ្លែងថា៖ «ទស្សនវិស័យធំទូលាយ និងការសម្រេចចិត្តយ៉ាងមុតមាំរវាងថ្នាក់ដឹកនាំកូរ៉េខាងជើង និងUS»៕