ក្រុងសេអ៊ូលៈ ប្រព័ន្ធផ្សព្វផ្សាយរដ្ឋកូរ៉េខាងជើង បានរាយការណ៍កាលពីថ្ងៃចន្ទថា មេដឹកនាំកូរ៉េខាងជើងលោក គីម ជុងអ៊ុន បានជួបជាមួយប្រធានាធិបតីគុយបា ដែលកំពុងបំពេញទស្សនកិច្ចនៅក្រុងព្យុងយ៉ាងនេះ និងបានពិភាក្សាអំពីបញ្ហាសំខាន់ៗនៃកង្វល់រួមស្តីពីស្ថានការណ៍អន្តរជាតិនៅពេលបច្ចុប្បន្ននេះ។
ដំណើរទស្សនកិច្ចរបស់លោក MiguelDiaz-Canel បានកើតឡើង នៅចំពេលដែលកិច្ចចរចារវាងកូរ៉េខាងជើង និងអាមេរិកជាប់គាំងរយៈពេលប៉ុន្មានថ្ងៃក្រោយពីក្រុងវ៉ាស៊ីនតោន បានដាក់ទណ្ឌកម្មសេដ្ឋកិច្ចទៅលើគុយបាថ្មីៗនេះ។
ចំណងទាក់ទងរវាងក្រុងវ៉ាស៊ីនតោន ជាមួយក្រុងឡាហាវ៉ាន ត្រូវបានស្តារឡើងវិញនៅក្នុងឆ្នាំ ២០១៥ បន្ទាប់ពីមានអរិភាពជាមួយគ្នាអស់រយៈពេលជាងកន្លះសតវត្សរ៍មកនោះ ប៉ុន្តែបានធ្វើឲ្យធ្លាក់ចុះយ៉ាងខ្លាំងចាប់តាំងពីប្រធានាធិបតីអាមេរិកលោក ដូណាល់ ត្រាំ ឡើងកាន់អំណាចមក។
ប្រទេសគុយបា គឺជាសម្ព័ន្ធមិត្តមួយក្នុងចំណោមសម្ព័ន្ធមិត្តរបស់កូរ៉េខាងជើង។ ភ្នាក់ងារព័ត៌មាន KCNA ជាផ្លូវការរបស់កូរ៉េខាងជើង បានឲ្យដឹងថា៖ «ក្នុងអំឡុងជំនួបនោះ មេដឹកនាំទាំង ២ បានផ្លាស់ប្តូរទស្សនៈស៊ីជម្រៅអំពីបញ្ហានៃកង្វល់រួមគ្នាទៅលើស្ថានការណ៍អន្តរជាតិ និងការឯកភាពគ្នាទៅលើបញ្ហាជាច្រើនរវាងប្រទេសរបស់ពួកគេ»។
ទូរទស្សន៍ KCNA បានរាយការណ៍ទៀតថា លោក Diaz-Canel ត្រូវបានទទួលស្វាគមន៍ ដោយលោកគីម ជុងអ៊ុន និងភរិយារបស់លោក គឺលោកស្រី Ri Sol Ju នៅឯព្រលានយន្តហោះអន្តរជាតិក្រុងព្យុងយ៉ាងកាលពីថ្ងៃអាទិត្យ ជាទីដែលលោកទទួលបានការគោរពពីឆ្មាំកាន់កាំភ្លើង ២១ នាក់ ហើយក្រោយមកទៀតបានចូលរួមពិធីជប់លៀងទទួលទានអាហារពេលល្ងាច និងមានការទស្សនាកម្សាន្តការប្រគំតន្ត្រី ជាការស្វាគមន៍យ៉ាងពិសេសនៅក្នុងទឹកដីកូរ៉េខាងជើង៕