ក្រុងសេអ៊ូលៈ ក្រសួងបង្រួបបង្រួម បានឲ្យដឹងកាលពីថ្ងៃចន្ទថា មេដឹកនាំកូរ៉េខាងជើងលោកគីម ជុងអ៊ុន នៅតែមានលទ្ធភាពទៅបំពេញទស្សនកិច្ចកូរ៉េខាងត្បូង នៅមុនដំណាច់ឆ្នាំនេះ ដោយបានបន្ថែមថា រដ្ឋាភិបាលនេះបន្តត្រៀមរៀបចំអ្វីដែលពាក់ព័ន្ធ។
លោក Baik Taehyun អ្នកនាំពាក្យក្រសួងនេះបានថ្លែងប្រាប់សន្និសីទកាសែតមួយថា៖ «យើងនៅតែមិនផ្លាស់ប្តូរគោលជំហររបស់យើង ដែលថា ដំណើរទស្សនកិច្ចរបស់លោក គីម ជុងអ៊ុន នឹងអាចកើតឡើងជាចាំបាច់នៅ មុនដំណាច់ឆ្នាំនេះ»។
យើងនឹងត្រៀមរៀបចំអ្វីៗ ដែលពាក់ព័ន្ធនឹងកិច្ចប្រឹងប្រែង ដើម្បីសម្រេចបានកិច្ចព្រមព្រៀងនានារវាងកូរ៉េទាំង ២ ដោយគ្មានបញ្ហាអ្វីកើតឡើង។
នៅក្នុងជំនួបលើកទី ៣ នៅក្នុងក្រុងព្យុងយ៉ាងកាលពីខែកញ្ញា លោក គីម ជុងអ៊ុន បានសន្យាថានឹងទៅទស្សនកិច្ចនៅកូរ៉េខាងត្បូង នៅពេលណាមួយសមស្រប ដែលជាថ្នូរនឹងដំណើរទស្សនកិច្ចរបស់លោកប្រធានាធីបតីមូនទៅកាន់រដ្ឋធានីរបស់កូរ៉េខាងជើង។
ដំណើរទស្សនកិច្ចរបស់លោក គីម ជុងអ៊ុន ទៅកាន់ កូរ៉េខាងត្បូងត្រូវបានរំពឹងទុកថានឹងកើតឡើងនៅចុងឆ្នាំនេះ ប៉ុន្តែមានក្តីមន្ទិលសង្ស័យថា ទស្សនកិច្ចនោះ កើតឡើងតាមការស្នើ ស្របពេលជាមួយកិច្ចពិភាក្សាពីការលុបបំបាត់នុយក្លេអ៊ែររវាងកូរ៉េខាងជើង និងអាមេរិកបានជាប់គាំងនោះ។
នៅក្នុងអំឡុងជំនួបមួយជាមួយលោកមូននៅអាហ្សង់ទីនកាលពីសប្តាហ៍មុន លោកប្រធានាធិបតី ដូណាល់ ត្រាំបានផ្តល់ភ្លើងខៀវដល់ដំណើរទស្សនកិច្ច ដែលនឹងកើតឡើងនៅមុនជំនួបលើកទី ២ រវាងលោក និងមេដឹកនាំកូរ៉េខាងជើងនោះ ដោយបានថ្លែងថាដំណើរទស្សនកិច្ចរបស់ គីមជុងអ៊ុន ទៅកូរ៉េខាងត្បូង នឹងជួយបង្កើនកម្លាំងជំរុញសម្រាប់កិច្ចប្រឹងប្រែង ដើម្បីលុបបំបាត់នុយក្លេអ៊ែរនៅឧបទ្វីបកូរ៉េ។
ទន្ទឹមនឹងនេះ ដោយមានការចាប់ផ្តើមធ្វើការត្រួតពិនិត្យផ្លូវរថភ្លើងរួមគ្នាជាមួយកូរ៉េខាងជើងនោះ លោក Baik ថ្លែងថា កិច្ចការនានា នឹងដំណើរការទៅមុខ ដោយមិនមានបញ្ហាអ្វីមករារាំងទេ៕
Yonhap/PSA