ក្រុងហុងកុងៈ មេដឹកនាំក្រុងហុងកុងលោកស្រី Carrie Lam កាលពីថ្ងៃអង្គារ បានសុំទោសចំពោះចលាចលនយោបាយ ដែលបានធ្វើឲ្យក្រុងហុងកុងរង្គោះរង្គើ ប៉ុន្តែប្រមុខប្រតិបត្តិគាំទ្រក្រុងប៉េកាំង បានបដិសេធមិនព្រមចុះចាញ់តាមការទាមទារឲ្យលោកស្រីចុះចេញពីតំណែងនោះទេ។
ទឹកដីពាក់កណ្តាលស្វយ័តមួយនេះ ត្រូវបានធ្លាក់ចូលទៅក្នុងវិបត្តិដ៏ធំបំផុតរបស់ខ្លួនក្នុងប៉ុន្មានទសវត្សរ៍មកនេះ ដោយមានប្រជាជនរាប់លាននាក់បានចេញតាមដងផ្លូវ ដើម្បីទាមទារឲ្យដកច្បាប់ដែលនឹងអនុញ្ញាតឲ្យធ្វើបត្យាប័នជាមួយចិនដីគោក។
លោកស្រី Carrie Lam បានពន្យារច្បាប់នោះកាលពីថ្ងៃសៅរ៍ ក្រោយពីមានការប្រមូលផ្តុំទ្រង់ទ្រាយធំ ២ ដែលបានបង្កឲ្យមានអំពើហិង្សារវាងប៉ូលិស និងក្រុមអ្នកតវ៉ា។
ក្រុមអ្នករៀបចំបានថ្លែងថា ប៉ុន្តែការពន្យារនោះមិនបានធ្វើឲ្យសាធារណជនថយកំហឹងទេ ហើយការជួបជុំធំជាងមុនកាលពីថ្ងៃអាទិត្យ បានទាក់ទាញមនុស្សជាង ២ លាននាក់ ឲ្យចូលរួម គឺចំនួនលើស ១ ភាគ ៤ នៃចំនួនប្រជាជនក្រុងហុងកុង។
លោកស្រី Carrie Lam បានថ្លែងប្រាប់សន្និសីទសារព័ត៌មានថា៖ «ខ្លួនខ្ញុំផ្ទាល់ត្រូវតែទទួលខុសត្រូវចំពោះបញ្ហានេះ។ ច្បាប់នេះ បានបង្កឲ្យមានភាពចម្រូងចម្រាស ជម្លោះនានា និងក្តីកង្វល់នៅក្នុងសង្គម»។
«ចំពោះបញ្ហានេះ ខ្ញុំសូមអភ័យទោសយ៉ាងស្មោះអស់ពីចិត្តរបស់ខ្ញុំ ចំពោះប្រជាជននៅក្រុងហុងកុងទាំងអស់»។
ក្រុមអ្នកតវ៉ាបានទាមទារថា ច្បាប់នោះគួរតែត្រូវបានដកចេញទាំងស្រុង ចំណែកលោកស្រី Carrie Lam ត្រូវចុះចេញពីតំណែង និងស៊ើបអង្កេតលើប៉ូលិសដែលប្រើប្រាស់ឧស្ម័នបង្ហូរទឹកភ្នែក និងគ្រាប់កាំភ្លើងកៅស៊ូបំបែកការតវ៉ា៕ AFP