ក្រុងសាណាៈ មន្ត្រីជាន់ខ្ពស់ម្នាក់នៃក្រុមឧទ្ទាមហ៊ូធីបានអំពាវនាវឲ្យក្រុមឧទ្ទាមបញ្ឈប់ការបាញ់គ្រាប់រ៉ុក្កែត និងការប្រើប្រាស់យន្តហោះដ្រូននៅក្នុងជម្លោះនៅយេម៉ែន ខណៈប្រេសិតរបស់អង្គការសហប្រជាជាតិ ត្រៀមធ្វើដំណើរទៅប្រទេសនេះ ដើម្បីរៀបចំកិច្ចចរចាសន្តិភាព។
លោក MohammedAli al-Huthi ប្រធានគណៈកម្មាធិការបដិវត្តន៍ជាន់ខ្ពស់ និងជាមន្ត្រីនយោបាយ ដែលមានឥទ្ធិពលម្នាក់ បានថ្លែងនៅលើគេហទំព័រធ្វីធើរថា ក្រុមរបស់លោកចង់ឲ្យ «មន្ត្រីគ្រប់ភាគីយេម៉ែនទាំងអស់» ទាមទារឲ្យមានបទឈប់បាញ់មួយ។
លោកបានសរសេរលើគេហទំព័រធ្វីធើរថា៖ «ពួកយើងបានចាប់ផ្តើមប្រកាសទៅក្រុមមន្ត្រីគ្រប់ភាគីយេម៉ែនទាំងអស់ឲ្យបញ្ឈប់ការបាញ់គ្រាប់រ៉ុក្កែត និងប្រើយន្តហោះដ្រូនវាយប្រហារប្រឆាំងប្រទេសទាំងនេះ ដើម្បីបន្តការឈ្លានពាន និងការឡោមព័ទ្ធរបស់ពួកគេរួមជាមួយនឹងការត្រៀមខ្លួនរួចជាស្រេចដើម្បីបញ្ឈប់កិច្ចប្រតិបត្តិការយោធាទាំងអស់ទៅលើគ្រប់ខ្សែត្រៀមទាំងអស់ ដើម្បីទទួលបានសន្តិភាព»។
សម្តីរបស់លោកបានកើតឡើង ក្រោយពីប្រេសិតពិសេសអង្គការសហប្រជាជាតិលោក Martin Griffiths បានថ្លែងកាលពីថ្ងៃសុក្រថា លោកគ្រោងធ្វើដំណើរទៅក្រុងសាណា ដែលកាន់កាប់ដោយក្រុមឧទ្ទាមនៅក្នុងសប្តាហ៍ក្រោយដើម្បីបញ្ចប់ការរៀបចំសម្រាប់ធ្វើកិច្ចចរចាសន្តិភាពដែលនឹងកើតឡើងនៅប្រទេសស៊ុយអែតនៅពេលឆាប់ៗនេះ។
លោក Griffiths ដែលកិច្ចខិតខំប្រឹងប្រែងរបស់លោក ដើម្បីចាប់ផ្តើមចរចាសន្តិភាពបានបរាជ័យកាលពីខែកញ្ញាកន្លងទៅនោះបានថ្លែងថា ភាគីរដ្ឋាភិបាល ដែលគាំទ្រដោយអារ៉ាប៊ី សាអ៊ូឌីត និងក្រុមឧទ្ទាមហ៊ូធី បានបង្ហាញការ «ប្តេជ្ញាចិត្តសាជាថ្មី» មួយដើម្បីធ្វើការដោះស្រាយនយោបាយមួយ ហើយអះអាងយ៉ាងម៉ឺងម៉ាត់ថាពួកគេនឹងចូលរួមកិច្ចចរចានោះ៕