.jpg)
យន្តហោះដ្រូនរបស់កងការពារបដិវត្តន៍អ៊ីរ៉ង់ ហោះហើរពីខាងលើទីតាំង ១ ដែលមិនត្រូវបានគេបង្ហាញ។ AFP
ក្រុងប៉ារីសៈ មេដឹកនាំមហាអំណាចអឺរ៉ុបសំខាន់ ៣ ប្រទេសកាលពីថ្ងៃអាទិត្យ បានអំពាវនាវឲ្យមានកិច្ចចរចាបញ្ចប់ភាពចម្រូងចម្រាសជុំវិញកម្មវិធីអាវុធនុយក្លេអ៊ែររបស់អ៊ីរ៉ង់ ខណៈភាពតានតឹងកាន់តែខ្លាំងឡើងរវាងក្រុងតេអេរ៉ង់ និងអាមេរិក។
សេចក្តីថ្លែងការណ៍ បានធ្វើឡើងដោយក្រុមមេដឹកនាំអង់គ្លេស បារាំង និងអាល្លឺម៉ង់ បានបង្ហាញក្តីបារម្ភថា កិច្ចព្រមព្រៀងឆ្នាំ ២០១៥ អំពីកម្មវិធីនុយក្លេអ៊ែររបស់អ៊ីរ៉ង់ បានបង្កឲ្យមានគ្រោះថ្នាក់ ដែលត្រូវដោះស្រាយបន្ថែមទៀត ប៉ុន្តែសេចក្តីថ្លែងការណ៍នោះ បានឲ្យដឹងទៀតថា វាអាស្រ័យទៅលើក្រុងតេអេរ៉ង់ ដែលត្រូវធានាឲ្យកិច្ចព្រមព្រៀងនោះរស់ឡើងវិញ។
សេចក្តីថ្លែងការណ៍ជាភាសាអង់គ្លេសដែលចេញផ្សាយដោយវិមាន Elysee បានថ្លែងថា៖ «យើងជឿជាក់ថា ពេលវេលាបានមកដល់ហើយ ដែលត្រូវទទួលខុសត្រូវ និងស្វែងរកផ្លូវមួយដើម្បីបញ្ចប់ភាពតានតឹងនោះ និងបន្តកិច្ចពិភាក្សាជាមួយគ្នាតទៅទៀត»។
នាវាដឹកប្រេងអ៊ីរ៉ង់បើកឆ្លងកាត់ឆ្នេរសមុទ្រ Gibraltar ហើយប៉ូលិស Gibraltar ចាប់ខ្លួនមន្ត្រី ២ នាក់ នៅលើនាវានេះ។ AFP
សេចក្តីថ្លែងការណ៍នោះ ត្រូវបានផ្សព្វផ្សាយ ក្រោយពីប្រធានាធិបតីបារាំងលោក អេម៉ានុយអែល ម៉ាក្រុង បានរៀបចំទទួលអធិការបតីអាល្លឺម៉ង់ លោកស្រី អេនជេឡា មឺរកែល និងគណៈរដ្ឋមន្ត្រីជាន់ខ្ពស់អង់គ្លេសលោក David-Lidington នៅឯកន្លែងប្រារព្ធពិធីព្យុហយាត្រាប្រចាំឆ្នាំនៅទីក្រុងប៉ារីស។
សេចក្តីថ្លែងការណ៍នោះ បានបន្ថែមថា៖ «វាចាំបាច់ណាស់សម្រាប់ក្រុមអ្នកចូលរួមចំណែកក្នុងការបង្អាក់ និងដោះស្រាយហានិភ័យ និងពិចារណាអំពីលទ្ធភាពផលវិបាកនានា និងស្វះស្វែងរកវិធី ដើម្បីទប់ស្កាត់។
មេដឹកនាំប្រទេសមហាអំណាចអឺរ៉ុបទាំង ៣ នោះ គឺនៅក្នុងចំណោមអ្នកដើរតួសំខាន់ៗនៅក្នុងកិច្ចព្រមព្រៀងនៅឆ្នាំ ២០១៥ (ដែលត្រូវបានគេស្គាល់ថា ជាផែនការសកម្មភាពទូលំទូលាយរួម ឬ JCPOA) ស្តីអំពីកម្មវិធីអាវុធនុយក្លេអ៊ែរអ៊ីរ៉ង់។
លោកប្រធានាធិបតី អេម៉ានុយអែល ម៉ាក្រុង (ស្តាំ) ស្វាគមន៍លោកស្រីអធិការបតី អេនជេឡា មឺរកែល។ AFP
ប៉ុន្តែប្រធានាធិបតីអាមេរិក លោក ដូណាល់ ត្រាំ កាលពីឆ្នាំ ២០១៨ បានប្រកាសថា ក្រុងវ៉ាស៊ីនតោន កំពុងដកខ្លួនចេញពីកិច្ចព្រមព្រៀងនោះ ដែលបានធ្វើឲ្យក្រុមសម្ព័ន្ធមិត្តអឺរ៉ុបរបស់ខ្លួនខកចិត្តយ៉ាងខ្លាំង។
ដោយបានខឹងសម្បាថា ការឡោមព័ទ្ធសេដ្ឋកិច្ចរបស់ខ្លួន មិនបានទទួលការដកទណ្ឌកម្មនានាដែលអ៊ីរ៉ង់ជឿជាក់ ត្រូវបានគេសន្យាស្ថិតនៅក្រោមកិច្ចព្រមព្រៀងនោះ អ៊ីរ៉ង់បានបង្កើនការចម្រាញ់អ៊ុយរ៉ានីញ៉ូមរបស់ខ្លួនបន្ថែមទៀត ដោយបានបង្កឲ្យមានការព្រមានយ៉ាងខ្លាំងក្លាពីសំណាក់ទីក្រុងវ៉ាស៊ីនតោន។
ប្រធានាធិបតីអ៊ីរ៉ង់ លោក ហាស្សាន រូហានី បានថ្លែងកាលពីថ្ងៃអាទិត្យនៅអំឡុងពេលដំណើរទស្សនកិច្ចទៅកាន់ខេត្តកូរ៉ាសាន់ភាគខាងជើងនៃប្រទេស អ៊ីរ៉ង់ ភាគឦសានថា៖ «ចាប់ពីថ្ងៃទី ៨ ខែ ឧសភា តទៅ យើងបានផ្លាស់ប្តូរយុទ្ធសាស្ត្រពីការអត់ធ្មត់របស់យើងទៅជាការសងសឹកទៅនឹងសកម្មភាពរបស់ភាគីផ្សេងទៀតដែលបានធ្វើចំពោះយើងនោះ»៕ AFP/SK
