.jpg)
លោកម៉ាក្រុង ចាប់ដៃជាមួយទាហានជើងចាស់នៅមូលដ្ឋានទ័ពនៅក្នុងក្រុង Verdun។ AFP
ក្រុងប៉ារីសៈ លោកប្រធានាធិបតីបារាំង អេម៉ានុយអែល ម៉ាក្រុង កាលពីថ្ងៃអង្គារ បានអំពាវនាវឲ្យមានកងទ័ពអឺរ៉ុបមួយពិតប្រាកដ ដើម្បីការពារខ្លួនប្រឆាំងនឹង រុស្ស៊ី និងអាមេរិក។
លោកម៉ាក្រុង ដែលបានជំរុញឲ្យមានកម្លាំងយោធាអឺរ៉ុបរួមគ្នាមួយចាប់តាំងពីលោកឡើងកាន់តំណែងមកនោះ បានថ្លែងថា អឺរ៉ុបចាំបាច់កាត់បន្ថយឯករាជភាពរបស់ខ្លួនទៅកម្លាំងអាមេរិក ក្រោយពីលោកប្រធានាធិបតីអាមេរិក ដូណាល់ ត្រាំបានប្រកាសថា លោកដកខ្លួនចេញ ពីសន្ធិសញ្ញា នុយក្លេអ៊ែរសម័យសង្គ្រាមត្រជាក់។
លោក ម៉ាក្រុង បានថ្លែងប្រាប់អឺរ៉ុបនៅក្នុងបទសម្ភាសតាមវិទ្យុលើកដំបូង ចាប់តាំងពីលោកក្លាយជាប្រធានាធិបតីកាលពីខែឧសភា ឆ្នាំ ២០១៧ ថា៖ «យើងត្រូវតែការពារខ្លួនយើងទប់ទល់ប្រទេសចិន រុស្ស៊ី និងសហរដ្ឋអាមេរិក»។
លោក បានថ្លែងទៀតថា៖ «នៅពេលខ្ញុំឃើញប្រធានាធិបតី ដូណាល់ ត្រាំ ប្រកាសថា លោកដកខ្លួនចេញពីសន្និសញ្ញាដកអាវុធដ៏សំខាន់ មួយដែលត្រូវបានបង្កើតឡើង ក្រោយពីវិបត្តិមីស៊ីលអឺរ៉ុបកាលពីទសវត្សរ៍ឆ្នាំ ១៩៨០ ដែលបានធ្វើឲ្យប៉ះពាល់ដល់អឺរ៉ុបថា តើជនរងគ្រោះដ៏សំខាន់ជានរណា? អឺរ៉ុប និងសន្តិសុខរបស់ខ្លួន»។
វិបត្តិមីស៊ីលអឺរ៉ុប គឺជាការប្រកួតប្រជែងអាវុធខ្នាតតូចនៅក្នុងសម័យសង្គ្រាមត្រជាក់ ដែលមើលឃើញថា មីស៊ីលបាលីស្ទិករបស់អាមេរិក ចូលអឺរ៉ុប ជាកត្តាដ៏សំខាន់មួយដែលធ្វើឲ្យរង្គោះរង្គើដល់សន្ធិសញ្ញានុយក្លេអ៊ែរចម្ងាយមធ្យមឆ្នាំ ១៩៨៧។
លោកម៉ាក្រុង ថ្លែងសុន្ទរកថាក្នុងពិធីរំឭកខួបសម្រាប់អ្នកនិពន្ធនិងអតីតទាហានបារាំង។ AFP
នៅក្នុងបទសម្ភាសមួយ ដែលត្រូវកត់ត្រាកាលពីរាត្រីថ្ងៃចន្ទនៅតំបន់ Verdun នៃប្រទេសបារាំងភាគឦសាន ខណៈលោក ធ្វើទស្សនកិច្ចអតីតរណសិរ្សលោកខាងលិចនៅក្នុងពិធីរំឭកដល់សតវត្សរ៍នៃសង្គ្រាមលោកលើកទី ១ នោះ លោកម៉ាក្រុង បានថ្លែងថា៖ «យើងនឹងមិនការពារពលរដ្ឋអឺរ៉ុបបានទេ ប្រសិនបើយើងមិនបានសម្រេចចិត្តធ្វើឲ្យមានកងទ័ពអឺរ៉ុបមួយពិតប្រាកដទេនោះ»។
លោកប្រធានាធិបតីអេម៉ានុយអែល ម៉ាក្រុង បានជំរុញឲ្យបង្កើត កងកម្លាំងអឺរ៉ុបមានចំនួន ៩ ប្រទេស ចូលរួម ដែលកងទ័ពនោះនឹងមានសមត្ថភាពធ្វើកិច្ចប្រតិបត្តិការយោធារួមយ៉ាងឆាប់រហ័ស ដើម្បីជម្លៀសចេញពីតំបន់សង្គ្រាម ឬផ្តល់ជំនួយក្រោយពីមានគ្រោះធម្មជាតិនានា ជាដើមនោះ។
រដ្ឋមន្ត្រីការបរទេសនៃប្រទេសចំនួន ៩ បានជួបប្រជុំគ្នានៅក្រុងប៉ារីសជាលើកដំបូងកាលពីថ្ងៃពុធ ដើម្បីចាប់ផ្តើមពិភាក្សាអំពីលក្ខខណ្ឌលម្អិតនៃរបៀប ដែលកងកម្លាំងនោះ នឹងធ្វើកិច្ចប្រតិបត្តិការរបស់ខ្លួន៕
