.jpg)
ក្រុមអ្នកគាំទ្ររដ្ឋាភិបាល ចូលរួមការជួបជុំមួយនៅក្នុងបរិវេណនៃវិមានប្រធានាធិបតី Miraflores នៅក្នុងការ៉ាកាសកាលពីថ្ងៃទី ២០ ខែ ឧសភា។ AFP
ក្រុងការ៉ាកាសៈ ប្រធានាធិបតីវ៉េណេស៊ុយអេឡាសម្បូរដោយបញ្ហាលោក នីកូឡាស ម៉ាឌូរ៉ូ បានជួបជុំជាមួយអ្នកតវ៉ារាប់រយនាក់នៅក្នុងក្រុងការ៉ាកាសកាលពីថ្ងៃចន្ទ ដើម្បីប្រារព្ធខួប ១ ឆ្នាំ នៃការជាប់ឆ្នោតជាថ្មីកាលពីខែ ឧសភា ឆ្នាំ ២០១៨ ដ៏ចម្រូងចម្រាស បន្ទាប់ពីលទ្ធផលឆ្នោតដែលត្រូវបានគេចាត់ទុកថាមានការលួចបន្លំ។
ដោយកាន់បដាសរសេរថា «ហែក្បួនសម្រាប់ជ័យជម្នះ» ក្រុមអ្នកគាំទ្ររបស់លោក ម៉ាឌូរ៉ូ បានចេញតាមដងផ្លូវនៃក្រុងវ៉េណេស៊ុយអេឡា ដោយមានមនុស្សជាច្រើនគ្រវីទង់ជាតិរបស់គណបក្សសង្គមនិយមដែលកំពុងកាន់អំណាច និងបានពាក់អាវយឺតពណ៌ក្រហមផង។
មានអ្នកខ្លះកាន់បដាដោយនិយាយថា៖ «លោក ត្រាំ ត្រូវបញ្ចប់ការរាំងខ្ទប់ទៅលើវ៉េណេស៊ុយអេឡា» ជាការនិយាយសំដៅឲ្យបញ្ឈប់ការដាក់ទណ្ឌកម្មរបស់អាមេរិកទៅលើរបបលោក ម៉ាឌូរ៉ូ។
លោក ម៉ាឌូរ៉ូ បានសរសេរនៅលើគេហទំព័រធ្វីធើរថា៖ «យើងប្រារព្ធខួបលើកទី១ នៃជ័យជម្នះរបស់ប្រជាជននៅថ្ងៃទី ២០ ខែ ឧសភា ជាថ្ងៃដែលវ៉េណេស៊ុយអេឡា បានសម្រេចចិត្តគាំទ្រសន្តិភាព ប្រជាធិបតេយ្យ និងសេរីភាព»។
លោក ម៉ាឌូរ៉ូ បានថ្លែងសុន្ទរកថាទៅកាន់ហ្វូងមនុស្សនៅខាងក្រៅវិមានប្រធានាធិបតី Miraflores ៕ AFP/SK
