ក្រុងការ៉ាកាស៖ លោកប្រធានាធិបតី នីកូឡាស ម៉ាឌូរ៉ូ កាលពីថ្ងៃចន្ទបានថ្លែងថា លោកមិនខ្លាចញញើតនឹងការតស៊ូប្រយុទ្ធរបស់យោធាទេ ដោយបានចោទសមភាគីអាមេរិកលោក ដូណាល់ ត្រាំ ពីបទប៉ុនប៉ងឈ្លានពានប្រទេស វ៉េណេស៊ុយអេឡាដោយគាំទ្រក្រុមសម្ព័ន្ធមិត្តក្នុងតំបន់។
លោក ម៉ាឌូរ៉ូ ដែលអមដោយកងកម្លាំងប្រដាប់អាវុធនៃមេបញ្ជាការជាន់ខ្ពស់បានថ្លែងសុន្ទរកថាដែលត្រូវបានចាក់ផ្សព្វផ្សាយតាមទូរទស្សន៍ថា៖ «យើងមិនចង់មានសង្គ្រាមយើងមិនចង់មានអំពើហិង្សាទេ ហើយយើងក៏មិនចង់មានអំពើភេរវកម្មដែរ ប៉ុន្តែយើងក៏មិនខ្លាចការតស៊ូប្រយុទ្ធរបស់យោធាដែរ ហើយយើងនឹងធានាឲ្យមានសន្តិភាព។
មេដឹកនាំសង្គមនិយមរូបនេះបានថ្លែងថា៖ «លោក ដូណាល់ ត្រាំ មានការជឿជាក់ថា មានភាពងាយស្រួលក្នុងការចូលលុកលុយប្រទេស វ៉េណេស៊ុយអេឡា ដោយលោកបានចោទប្រកាន់អាមេរិកថា បានរៀបចំកងកម្លាំងស៊ីឈ្នួល ដើម្បីឲ្យចូលឈ្លានពានប្រទេស វ៉េណេស៊ុយអេឡា នោះ»។
អាមេរិក គឺជាប្រទេសមួយនៅក្នុងចំណោមប្រទេសចំនួនជាង ៥០ ដែលបានទទួលស្គាល់មេដឹកនាំប្រឆាំង លោក ចួន ហ្គៃដូ ថា ជាប្រធានាធិបតីបណ្តោះអាសន្ន ក្រោយពីការបោះឆ្នោតជាថ្មីរបស់លោក នីកូឡាស ម៉ាឌូរ៉ូ នៅក្នុងឆ្នាំ ២០១៨ ត្រូវបានគេរិះគន់ជាទូទៅថា មានការលួចបន្លំសន្លឹកឆ្នោត។
ទោះបីជាយ៉ាងក៏ដោយក៏លោក ម៉ាឌូរ៉ូ មានការគាំទ្រពីប្រទេស តួកគី រុស្ស៊ី ចិន និងគុយបា ដែរ។
លោកប្រធានាធិបតី នីកូឡាស ម៉ាឌូរ៉ ក៏បានថ្លែងដែរថា មានទាហានរត់ចោលជួរជាច្រើនក្រុម ដែលកំពុងហ្វឹកហាត់នៅក្នុងប្រទេស កូឡុំប៊ី ដែលនៅជិតខាង ដើម្បីលួចចូលវាយប្រហារលើអង្គភាពយោធានានានៅក្នុងប្រទេស វ៉េណេស៊ុយអេឡា៕ AFP/PSA