ក្រុងម៉ិកស៊ីកូៈ ប្រមុខកងទ័ពបានថ្លែងកាលពីថ្ងៃចន្ទថា ប្រទេស ម៉ិកស៊ិក បានដាក់ពង្រាយទាហាន និងកងការពារជាតិជិត ១៥ ពាន់នាក់ នៅព្រំដែនរបស់ខ្លួនជាមួយអាមេរិក ដោយទទួលស្គាល់ថាពួកគេកំពុងចាប់ឃុំខ្លួនក្រុមជនចំណាកស្រុកដែលបានព្យាយាមឆ្លងព្រំដែន ក្រោយពីគោលនយោបាយបានបង្កឲ្យមានប្រតិកម្មយ៉ាងខ្លាំងក្លា។
ស្ថិតនៅក្រោមសម្ពាធពីប្រធានាធិបតីអាមេរិកលោក ដូណាល់ ត្រាំ ដែលបានបង្ហាញពីការកើនឡើងនៃក្រុមជនចំណាកស្រុកអាមេរិកកណ្តាល ដែលបានឆ្លងកាត់ព្រំដែននោះ ប្រទេស ម៉ិកស៊ិក បានសន្យាកាលពីដើមខែនេះថានឹងដាក់ បន្ថែមកម្លាំងនៅតាមព្រំដែនភាគខាងត្បូងរបស់ខ្លួន ដោយមានកងកម្លាំងការពារជាតិ ៦ ពាន់នាក់ ប៉ុន្តែកាលពីពេលកន្លងទៅបានប្រកាសវិសាលភាពនៃការបង្ក្រាបទៅលើក្រុមជនចំណាកស្រុកនៅតាមព្រំដែនភាគខាងជើងរបស់ខ្លួន។
រដ្ឋមន្ត្រីការពារជាតិលោក Luis Cresencio Sandovalបានថ្លែងនៅឯសន្និសីទសារព័ត៌មានមួយជាមួយលោក ប្រធានាធិបតី Andres Manuel Lopez Obrador ថា៖ «យើងបានដាក់ពង្រាយទាហាន និងកងកម្លាំងការពារជាតិ និងមន្ត្រីយោធាចំនួន ១៤ ពាន់នាក់ ដែលមានចំនួនសរុបជិត ១៥ ពាន់នាក់ នៅក្នុងប្រទេសនេះភាគខាងជើង»។
ដោយត្រូវបានគេសួរថា តើកងកម្លាំងទាំងអស់នោះ កំពុងឃុំខ្លួនជនចំណាកស្រុក ដើម្បីទប់ស្កាត់ពួកគេមិនឲ្យឆ្លងកាត់ព្រំដែនឬ? លោក Sandoval បានថ្លែងឲ្យដឹងថា៖ «ជាការពិតណាស់ កងកម្លាំងបានចាប់ឃុំខ្លួនពួកគេមែន»។
លោក Sandoval បានថ្លែងថា៖ «ការផ្តល់ជូនឯកសារទេសន្តរប្រវេសន៍មិនគ្រប់គ្រាន់នោះ គឺមិនមែនជាអំពើឧក្រិដ្ឋកម្មទេ ប៉ុន្តែប្រសើរជាងការរំលោភច្បាប់រដ្ឋបាល យើងគ្រាន់តែចាប់ឃុំខ្លួនពួកគេជាបណ្តោះអាសន្នទេ ហើយបន្ទាប់មកប្រគល់ពួកគេទៅឲ្យ» ក្រុមអាជ្ញាធរទទួលបន្ទុកជនអន្តោប្រវេសន៍វិញ។
រដ្ឋាភិបាល បានប្រឈមមុខការរិះគន់ ជុំវិញការបញ្ឈប់ជនចំណាកស្រុក មិនឲ្យឆ្លងកាត់ព្រំដែនអាមេរិក-ម៉ិកស៊ិក។ កងទ័ពការពារជាតិ និងប៉ូលិស បានកំពុងយាមល្បាតនៅតាមព្រំដែនជាក្រុមៗ។
ប៉ូលិស ត្រូវបានផ្លាស់ប្តូរចេញពីកន្លែងអនុវត្តការងារយ៉ាងប្រញាប់ប្រញាល់។ កងកម្លាំងសន្តិសុខម៉ិកស៊ិក បានឃុំខ្លួនក្រុមជនចំណាកស្រុក ដែលមិនមានឯកសារគ្រប់គ្រាន់រយៈពេលយ៉ាងយូរ ខណៈដែលពួកគេបានធ្វើដំណើរនៅក្នុងប្រទេសមួយនេះ ប៉ុន្តែតាមធម្មតាមិនអាចបញ្ឈប់ពួកគេមិនឲ្យឆ្លងកាត់ព្រំដែនអាមេរិកដូចពីមុនបាននោះទេ។
ការអនុវត្តច្បាប់ បានបង្កឲ្យមានការប្រឆាំងយ៉ាងខ្លាំងក្លា ក្រោយពីអ្នកថតរូបឲ្យកាសែត AFP ម្នាក់ បានរៀបចំឯកសារកាលពីសប្តាហ៍មុនអំពីរបៀបដែលទាហាន និងកងកម្លាំងការពារជាតិប្រដាប់អាវុធធុនធ្ងន់ ដែលឈរជើងនៅក្រុង Ciudad Juarez បានធ្វើការឃាត់ខ្លួនស្ត្រី ២ នាក់ និងក្មេងស្រីម្នាក់មិនឲ្យឆ្លងកាត់ទន្លេ Rio Grande៕ AFP/SK