.jpg)
សមាជិកនៃក្រុមសង្គ្រោះដាក់តម្រៀបថង់សាកសពជាជួរនៅកំពង់ផែមួយនៅក្នុងស្រុក Tanjung Priok ភាគខាងជើងក្រុងហ្សាការតាក្រោយស្រង់ចេញពីទឹកកាលពីថ្ងៃទី ២៩ តុលា។ AFP
ក្រុងហ្សាការតាៈ យន្តហោះ Boeing-737 MAX របស់ក្រុមហ៊ុនអាកាសចរណ៍ឥណ្ឌូនេស៊ី Lion Air បានធ្លាក់ចូលក្នុងសមុទ្រកាលពីថ្ងៃចន្ទប៉ុន្មានម៉ោងក្រោយពីហោះចេញពីក្រុងហ្សាការតា ជាគ្រោះថ្នាក់ថ្មីបំផុតនៅក្នុងចំណោមគ្រោះថ្នាក់ផ្លូវអាកាសដែលធ្វើឲ្យកក្រើកប្រជុំកោះមួយនេះ។
ឥណ្ឌូនេស៊ីពឹងផ្អែកទៅលើការដឹកជញ្ជូនតាមផ្លូវអាកាសដើម្បីទាក់ទងកោះរាប់ពាន់របស់ខ្លួន ប៉ុន្តែបានរងគ្រោះថ្នាក់ធ្លាក់យន្តហោះ បណ្តាលឲ្យមនុស្សស្លាប់ច្រើនបំផុតនៅក្នុងរយៈពេលប៉ុន្មានខែថ្មីៗកន្លងទៅនេះ។
វិស័យអាកាសចរណ៍របស់ឥណ្ឌូនេស៊ី បានពង្រីកយ៉ាងឆាប់រហ័ស ខណៈសេដ្ឋកិច្ចរីកចម្រើននោះ ប៉ុន្តែមានកង្វល់ជាច្រើនដែលក្រុមហ៊ុនអាកាសចរណ៍ជាច្រើន កំពុងខិតខំប្រឹងប្រែងស្វែងរកបុគ្គលិកមានការបណ្តុះបណ្តាលត្រឹមត្រូវ ដើម្បីតាមឲ្យទាន់ការរីកចម្រើនយ៉ាងឆាប់រហ័សនេះ។
ដោយធ្លាប់ត្រូវហាមប្រាមពីលម្ហអាកាសអឺរ៉ុបជុំវិញការភ័យខ្លាចចំពោះសុវត្ថិភាព សហភាពអឺរ៉ុប ក៏បានដកអាកាសចរណ៍ឥណ្ឌូនេស៊ីចេញពីបញ្ជីខ្មៅសុវត្ថិភាពរបស់ខ្លួននៅក្នុងឆ្នាំ ២០១៨ បន្ទាប់ពីប្រទេសនេះ បានធ្វើការកែលម្អយ៉ាងច្រើនរួចមក។
នេះ គឺជាមហន្តរាយអាកាសចរណ៍ដ៏អាក្រក់នៅក្នុងប្រវត្តិសាស្ត្ររបស់ប្រទេសនេះ។ មហន្តរាយដ៏អាក្រក់បំផុតនៅក្នុងប្រវត្តិសាស្ត្រអាកាសចរណ៍របស់ឥណ្ឌូនេស៊ី បានបណ្តាលឲ្យមនុស្ស ២៣៤ នាក់ស្លាប់នៅក្នុងឆ្នាំ ១៩៩៧។
យន្តហោះ Airbus A-300B4 ដែលប្រតិបត្តិការដោយក្រុមហ៊ុនដឹកជញ្ជូន Garuda Indonesia បានធ្លាក់ក្នុងជ្រលងភ្នំពោរពេញដោយផ្សែងអ័ព្ទខ្លាំងនៅកោះស៊ូម៉ាត្រា ភាគខាងជើង ក្រោយហោះចេញពីព្រលានយន្តហោះក្រុងមេដានរបស់ឥណ្ឌូនេស៊ី។
សមាជិកនៃក្រុមជួយសង្គ្រោះយកសម្ភាររបស់អ្នកដំណើរ និងបំណែកយន្តហោះទៅដាក់នៅកំពង់ផែ។ AFP
កាលពីឆ្នាំ ២០១៤ យន្តហោះរបស់ក្រុមហ៊ុន AirAsia បានធ្លាក់ចូលក្នុងសមុទ្រជ្វានៅក្នុងពេលខ្យល់ព្យុះខ្លាំងនោះ ដោយបានបណ្តាលឲ្យមនុស្ស ១៦២ នាក់ស្លាប់។ ជើងហោះហើរ នេះ ចេញពីក្រុងស៊ូរ៉ាបាយ៉ា នៃប្រទេសឥណ្ឌូនេស៊ីទៅកាន់ ប្រទេសសិង្ហបុរី។
យន្តហោះហោះហើរក្នុងស្រុករបស់ក្រុមហ៊ុនអាកាសចរណ៍ Mandala Airlines បានធ្លាក់ភ្លាមៗ ក្រោយពី ហោះឡើងនៅក្នុងឆ្នាំ ២០១៥ ចូលទៅក្នុងតំបន់ជាយក្រុងមានប្រជាជនច្រើននៅក្នុងក្រុងមេដាន ជាក្រុងមួយមានប្រជាជនសរុប ២ លាននាក់នៅលើកោះស៊ូម៉ាត្រា ដោយបានបណ្តាលឲ្យមនុស្សយ៉ាងតិច ១៥០ នាក់ស្លាប់ នៅក្នុងនោះមានអ្នកដំណើរ យានិក និងប្រជាជនមួយចំនួនទៀត។
នៅក្នុងខែមិថុនា ឆ្នាំ ២០១៥ យន្តហោះយោធាឥណ្ឌូនេស៊ីមួយគ្រឿង បានធ្លាក់ភ្លាមៗនៅក្នុងតំបន់លំនៅឋាននៅក្នុងក្រុងមេដាន ក្រោយពីយន្តហោះនោះ ហោះចេញពីព្រលាន ដោយបណ្តាលឲ្យមនុស្សប្រហែល ១២២ នាក់ ស្លាប់ ភាគច្រើនក្នុងចំណោមពួកគេគឺជាទាហាន ស្ត្រី និងក្រុមគ្រួសាររបស់ពួកគេ៕
អ្នកស្រី Putri (កណ្តាល) យំដោយសារបាត់ប្តី និងកូនដែលជិះយន្តហោះ។ AFP
អាជ្ញាធរព្រលានយន្តហោះ ធ្វើសន្និសីទកាសែតទាក់ទងការធ្លាក់យន្តហោះ។ AFP
