ក្រុងបេរូត: ស្ត្រីអ្នកនាំពាក្យឲ្យកងទ័ពបានឲ្យដឹង កាលពីថ្ងៃចន្ទ ថា ស្ត្រីអង់គ្លេសម្នាក់ដែលរួមប្រយុទ្ធជាមួយក្រុមកងទ័ពឃើដ នៅក្នុងតំបន់អាហ្រ្វីន នៅស៊ីរី ត្រូវបានសម្លាប់ អំឡុងប្រតិបត្តិការវាយប្រហារដឹកនាំដោយតួកគីទៅលើតំបន់នេះ។
នាង Nisrin Abdallah អ្នកនាំពាក្យ ក្រុមអង្គភាពប្រជាការពារនារីឃើដ (YPJ) បានឲ្យដឹងថា នាង Anna Campbell ត្រូវបានសម្លាប់នៅក្នុងដែនដី អាហ្រ្វីន (Afrin enclave)។
នាង Abdallah បានថ្លែងប្រាប់ AFP ថា៖ «នាងស្លាប់កាលពីថ្ងៃទី ១៥ ខែមីនា ឆ្នាំ ២០១៨ អំឡុងការវាយប្រហារដោយគ្រាប់បែកផ្លោងពីកងទ័ពតួកគីទៅលើខ្សែត្រៀមសមរភូមិជាច្រើន ជុំវិញទីក្រុងអាហ្រ្វីន (Afrin city) ដោយបានបន្ថែមទៀតថា នាង Campbell មាន អាយុ ២៧ ឆ្នាំនៅពេលនាងបានស្លាប់។
នាងបានថ្លែងថា «យើងបានដឹងពីការស្លាប់របស់នាងកាលពីម្សិលមិញ និង បានទាក់ទងជាមួយឪពុកម្តាយរបស់នាងដោយបានបញ្ជាក់ថា នាង Campbell មានលំនៅស្ថានក្នុងទីប្រជុំជន Lewes ក្នុងតំបន់ East Sussex។
ក្រុងអង់ការ៉ា និង ក្រុមចម្រុះឧទ្ទាមនៅស៊ីរី បានចាប់ផ្តើមបើកការវាយប្រហាររបស់ខ្លួនទៅលើតំបន់ អាហ្រ្វីន កាលពីថ្ងៃទី ២០ ខែមករា ដោយបានច្បាំងដណ្តើមផ្នែកជាច្រើន នៃដែនដីក្នុងតំបន់នោះមុនពេលច្បាំងដណ្តើមបានចំណុចកណ្តាលទីក្រុងនោះ កាលពីថ្ងៃអាទិត្យ។
ពួកគេសម្រុកចូលទៅក្នុងទីក្រុងនោះបន្ទាប់ពីក្រុមយុទ្ធនារីមកពីអង្គភាព YPJ និងក្រុមសមភាគីជាបុរសរបស់ក្រុមអង្គភាពនេះ គឺអង្គភាពប្រជាការពារ (YPG) ហាក់បានដកទ័ពចេញ។
នាង Abdallah បានថ្លែងថា Campbell បានចូលរួមបម្រើក្នុងជួរកងទ័ព YPJ នៅក្នុងខែ ឧសភា ឆ្នាំ ២០១៧ ប៉ុន្តែ មិនទាន់បានដាក់ពង្រាយកងកម្លាំងនៅសមរភូមិមុខនៅឡើយរហូតដល់ខែនេះ។
នាង Abdallah បានថ្លែងថា៖«បន្ទាប់ពីមានការប្រហារលើទីក្រុងអាហ្រ្វីនមក នាងបានស្នើសុំឲ្យគេបញ្ជូននាងទៅទីនោះ»។
នាងបានបន្ថែមថា៖«យើងបានពិភាក្សាជាមួយនាងជាច្រើនដង ប៉ុន្តែ នាងបានបោះសម្តីជាចុងក្រោយថា៖«ឲ្យខ្ញុំដកខ្លួនចេញពីបដិវត្តន៍ ឬ បញ្ជូនខ្ញុំទៅកាន់តំបន់អាហ្រ្វីន»។
ក្រុមយុទ្ធជន និងយុទ្ធនារីបរទេសជាច្រើននាក់បានចូលរួមក្នុងជួរកងទ័ពអង្គភាពYPGនិងអង្គភាពកងទ័ពYPJនៅស៊ីរី ដោយមនុស្សជាច្រើននាក់បាននិយាយថា ពួកគេចង់គាំទ្រ«បដិវត្តន៍»ដើម្បីបុព្វហេតុលទ្ធិប្រជាធិបតេយ្យមានការចូលរួមពីពលរដ្ឋនិងសិទ្ធិនារី៕AFP/ SN