ក្រុងខារទុំៈ យោធាស៊ូដង់កាលពីថ្ងៃអង្គារ បានលុបចោលកិច្ចព្រមព្រៀងផ្ទេរអំណាចជាមួយក្រុមអ្នកតវ៉ា ហើយបានអំពាវនាវឲ្យមានការបោះឆ្នោតនៅក្នុងរយៈពេល ៩ ខែ ១ ថ្ងៃ ក្រោយពីក្រុមបាតុករជាង ៣៥ នាក់ បានស្លាប់នៅក្នុងអ្វីដែលពួកគេហៅថា ជា «ការសម្លាប់យ៉ាងរង្គាល»។
ក្រុមមេដឹកនាំតវ៉ា បានអំពាវនាវឲ្យក្រុមអ្នកគាំទ្ររបស់ពួកគេចូលរួមនៅក្នុង «ការបះបោរស៊ីវិល» ដើម្បីផ្តួលរំលំក្រុមប្រឹក្សាយោធា ដែលកំពុងគ្រប់គ្រងអំណាច បន្ទាប់ពីបំបែកក្រុមអ្នកតវ៉ាអស់ជាច្រើនសប្តាហ៍បណ្តាលឲ្យស្លាប់នៅខាងក្រៅទីបញ្ជាការយោធានៅក្រុងខារទុំនោះ។
ក្រុមប្រឹក្សាយោធាមជ្ឈិម បានទម្លាក់លោកប្រធានាធិបតី អូមារ- អាល់-បាសៀរ កាលពីខែមេសា ក្រោយពីធ្វើការតវ៉ាអស់ជាច្រើនខែប្រឆាំងការគ្រប់គ្រងផ្តាច់ការរបស់លោក ហើយបានឯកភាពធ្វើការផ្លាស់ប្តូររយៈពេល ៣ ឆ្នាំ ទៅឲ្យរដ្ឋការស៊ីវិលមួយគ្រប់គ្រងជំនួសវិញ។
ប៉ុន្តែប្រមុខយោធា លោកឧត្តមសេនីយ៍ Abdel Fattah al-Burhan បានប្រកាសនៅក្នុងសេចក្តីថ្លែងការណ៍តាមទូរទស្សន៍មួយថា ផែនការនោះត្រូវបានលុបចោលវិញ ហើយការបោះឆ្នោតនឹងគ្រោងធ្វើឡើងស្ថិតនៅក្រោមការត្រួតពិនិត្យពីអន្តរជាតិ និងក្នុងតំបន់»។
លោក Abdel Fattah al-Burhan បានថ្លែងថា៖ «ក្រុមប្រឹក្សាយោធាបានសម្រេចចិត្តលុបចោលនូវអ្វីដែលបានព្រមព្រៀងគ្នា និងឈប់ចរចាជាមួយសម្ព័ន្ធមិត្តដើម្បីសេរីភាព និងការផ្លាស់ប្តូរ ហើយបានអំពាវនាវឲ្យមានការបោះឆ្នោតនៅក្នុងរយៈពេលមួយដែលមិនឲ្យលើសពី ៩ ខែឡើយ»។
បាតុកររាប់សិបនាក់ស្លាប់ និងរាប់រយនាក់រងរបួស នៅក្នុងការបង្រ្កាបកាលពីថ្ងៃចន្ទ ដែលត្រូវបានថ្កោលទោសពីអន្តរជាតិ៕ AFP/SK