.jpg)
ក្រុមបុរសស៊ីរីជិះម៉ូតូរបស់ពួកគេ ខណៈរថយន្តយោធាអាមេរិកកំពុងបើកចេញពីមូលដ្ឋាននៅក្រុង តាល់ តាមរ៍ កាលពីថ្ងៃទី ២០ ខែតុលា។ AFP
ក្រុងប៊ែរឡាំង៖ រដ្ឋមន្ត្រីការបរទេសអាល្លឺម៉ង់ លោក ហ៊ីកូ ម៉ាអាស់ បានថ្លែងកាលពីថ្ងៃអាទិត្យថា ការវាយប្រហារទ្រង់ទ្រាយធំរបស់ប្រទេស តួកគី នៅស៊ីរីភាគឦសាន បានបំពានច្បាប់អន្តរជាតិរួចទៅហើយ។
លោក ហ៊ីកូ ម៉ាអាស់ បានថ្លែងប្រាប់ប្រព័ន្ធផ្សព្វផ្សាយ ZDF អាល្លឺម៉ង់ថា៖ «យើងមិនជឿថា ការវាយប្រហារមួយទៅលើអង្គភាពឃើដ ឬ ក្រុមយុទ្ធជនឃើដ គឺត្រឹមត្រូវតាមច្បាប់អន្តរជាតិនោះទេ»។
លោកបានថ្លែងនៅក្នុងការអត្ថាធិប្បាយរបស់លោកយ៉ាងខ្លាំងៗអំពីការវាយប្រហារនោះថា៖ «ប្រសិនបើគ្មានមូលដ្ឋាននៅក្នុងច្បាប់អន្តរជាតិ សម្រាប់ការឈ្លានពានមួយបែបនេះ បន្ទាប់មកវាមិនអាចស្របទៅតាមច្បាប់អន្តរជាតិនោះទេ»។
ក្រុងអង់ការ៉ា បានបើកការវាយប្រហារនៅតាមព្រំដែន ប្រឆាំងក្រុមឃើដនៅស៊ីរីកាលពីថ្ងៃទី ៩ ខែតុលា ក្រោយពីអាមេរិកបានប្រកាសឲ្យដកយោធាចេញពីប្រទេសហែកហួរដោយសង្គ្រាមនៅភាគខាងជើង ដែលបានធ្វើឲ្យមានការរិះគន់យ៉ាងខ្លាំងពីសំណាក់អន្តរជាតិ។
ប្រទេស តួកគី ជាសមាជិករបស់អង្គការណាតូ បានបញ្ជាក់ហេតុផលអំពីការវាយប្រហារនោះថា ជាកិច្ចការចាំបាច់ដើម្បីធានាសុវត្ថិភាពព្រំដែនរបស់ខ្លួន។
បទឈប់បាញ់ដែលបានសម្របសម្រួលដោយអាមេរិកត្រូវបានប្រកាសកាលពីរសៀលថ្ងៃព្រហស្បតិ៍ ដោយបានផ្តល់ឲ្យកងកម្លាំងឃើដរហូតដល់រសៀលថ្ងៃអង្គារ ដើម្បីដកកងកម្លាំងចេញពីតំបន់សុវត្ថិភាពមួយ ដែលក្រុងអង់ការ៉ា ចង់បង្កើតនៅក្នុងទឹកដីប្រទេស ស៊ីរី នៅតាមបណ្តោយព្រំដែនភាគខាងត្បូងរបស់ខ្លួន។
កាលពីថ្ងៃអាទិត្យ កងកម្លាំងប្រជាធិបតេយ្យស៊ីរីដឹកនាំដោយក្រុមឃើដ បានដកទាំងស្រុងចេញពីទីក្រុងដែលឡោមព័ទ្ធដោយកងកម្លាំងតួកគី នៅស៊ីរីភាគខាងជើង ទៅនឹងអ្វីដែលបានបង្ហាញថា ជាការចាប់ផ្តើមនៃការដកកម្លាំងយ៉ាងច្រើន ស្ថិតនៅក្រោមកិច្ចព្រមព្រៀងបទឈប់បាញ់នោះ។
លោក ម៉ាអាស់ បានថ្លែងថា៖ «យើងនឹងធ្វើអ្វីៗគ្រប់យ៉ាងដែលយើងអាចធានាថា បទឈប់បាញ់នេះមានរយៈពេល ៥ ថ្ងៃមកហើយ ដើម្បីបញ្ឈប់ការឈ្លានពាននៅពេលបច្ចុប្បន្នរបស់ប្រទេស តួកគី»។
ប្រទេស អាល្លឺម៉ង់ រួមមានបណ្តាប្រទេសអឺរ៉ុបផ្សេងទៀតបានផ្អាកការនាំចេញអាវុធទៅកាន់ប្រទេស តួកគី ដោយសារការវាយលុកទ្រង់ទ្រាយធំទៅលើក្រុមឃើដនោះ៕ AFP/SK
