.jpg)
លោក រដ្ឋមន្ត្រីការពារជាតិJeong Kyeong-doo ស្លៀកពាក់ឈុតខ្មៅ និងក្រុមមន្ត្រីមេបញ្ជាការជាន់ខ្ពស់គោរពទង់ជាតិនៅក្នុងអំឡុងជំនួបមួយនៅក្នុងក្រុងសេអ៊ូល។ Yonhap
ក្រុងសេអ៊ូលៈ នៅថ្ងៃពុធនេះ រដ្ឋមន្ត្រីការពារជាតិកូរ៉េខាងត្បូង លោក Jeong Kyeong-doo បានថ្លែងសង្កត់ធ្ងន់ពីសារៈសំខាន់នៃការរក្សាជំហរការពារជាតិឲ្យរឹងមាំ ដើម្បីគាំទ្រដល់ដំណើរការសន្តិភាពនៅឧបទ្វីបកូរ៉េ។
ដោយបានធ្វើជាអធិបតីជំនួបចុងឆ្នាំជាមួយមេបញ្ជាការជាន់ខ្ពស់ជាង ១៤០រូប នៅទូទាំងប្រទេស រដ្ឋមន្ត្រីការពារជាតិរូបនេះ បានបញ្ជាក់ថា សសរគ្រឹះពីរនៃយុទ្ធសាស្ត្រសន្តិសុខរបស់រដ្ឋាភិបាលគឺ សន្តិភាព និងសមត្ថភាពការពារជាតិខ្លាំងបំផុត។
លោក Jeong បានថ្លែងនៅពេលចាប់ផ្តើមកិច្ចប្រជុំ ដែលត្រូវធ្វើឡើងនៅបរិវេណក្រសួងការពារជាតិនៅក្នុងក្រុងសេអ៊ូលថា៖ «មិនគួរមានការផ្លាស់ប្តូរចំពោះបេសកកម្ម និងតួនាទីយោធារបស់យើងទេ ថ្វីបើភាពតានតឹងខាងយោធារវាងកូរ៉េខាងត្បូង និងកូរ៉េខាងជើង ថយកម្តៅបន្តិចក្តី ហើយយើងចាំបាច់ត្រូវបង្កើតទំនុកចិត្តនៅជួរកងទ័ពរបស់យើង»៕ Yonhap/PSA
