.jpg)
លោកឧត្តមសេនីយ៍ ប្រាយុធ ចានអូចា បង្ហាញទឹកមុខខឹងនៅពេលមេដឹកនាំបក្សប្រជាធិបតេយ្យ និងបក្សភឿថៃពហិការជំនួបនៅថ្ងៃសុក្រ។ BKP
ក្រុងបាងកកៈ ក្រោយពីមានការពន្យារពេលម្តងហើយម្តងទៀតនោះ របបសឹកថៃបានប្រកាសថា ខ្លួននឹងដកបម្រាមលើសកម្មភាពនយោបាយនៅថ្ងៃអង្គារនេះ នៅពេលច្បាប់បោះឆ្នោតតំណាងរាស្ត្រ ចូលជាធរមាន ដោយអនុញ្ញាតឲ្យគណបក្សនយោបាយទាំងអស់បន្តសកម្មភាព ដើម្បីរៀបចំការបោះឆ្នោតជាផ្លូវការនៅថ្ងៃទី ២៤ ខែកុម្ភៈ ខាងមុខនេះ។
ទោះជាយ៉ាងណាក៏ដោយក៏ យុទ្ធនាការឃោសនាបោះឆ្នោត នឹងមិនត្រូវអនុញ្ញាតឲ្យធ្វើសកម្មភាពរហូតថ្ងៃទី ២ ខែមករាទេ នៅពេលដែលព្រះរាជក្រឹត្យមួយ ដែលបានអំពាវនាវឲ្យកាលបរិចេ្ឆទការបោះឆ្នោតត្រូវបានបោះពុម្ពផ្សាយនៅក្នុងសារព័ត៌មានភូមិន្ទ។
នោះ មានន័យថា គណបក្សនយោបាយទាំងអស់ នឹងមានពេលវេលាមិនដល់ ២ ខែផង ដើម្បីទាក់ទាញអ្នកបោះឆ្នោតទៅបោះឆ្នោតឲ្យពួកគេ។
កាលបរិច្ឆេទការបោះឆ្នោតនឹងត្រូវបានគេបញ្ជាក់នៅក្នុងកិច្ចប្រជុំនៅថ្ងៃសុក្ររវាងក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ (NCPO) និងក្រុមតំណាងនៃបក្សនយោបាយទាំងអស់នៅឯក្លិបកងទ័ពនៅផ្លូវ Vibhavadi Rangsit ក្នុងក្រុងបាងកក។
កិច្ចប្រជុំនោះត្រូវបានចូលរួមដោយតំណាងជាច្រើនមកពីរដ្ឋាភិបាល សភានីតិប្បញ្ញត្តិ ជាតិ គណៈកម្មាធិការរៀបចំការបោះឆ្នោត និងគណៈកម្មាធិការព្រាងច្បាប់រដ្ឋធម្មនុញ្ញ។
នៅក្នុងជំនួបនោះ លោកឧបនាយករដ្ឋមន្ត្រី WissanuKreangam បានប្រកាស ការគ្រោងពេលវេលាការបោះឆ្នោតនោះ ដោយថ្លែងថា នៅថ្ងៃអង្គារ NCPO នឹងលុបចោលបទបញ្ជាទាំង ៩ និងសេចក្តីប្រកាស ដែលហាមប្រាមរាល់សកម្មភាពនយោបាយ នៅពេលច្បាប់បោះឆ្នោតសមាជិកតំណាងរាស្ត្រត្រូវបានអនុម័ត។
បច្ចុប្បន្ននេះ NCPO ដកបម្រាម ដោយអនុញ្ញាតឲ្យគ្រប់គណបក្សទាំងអស់រៀបចំកិច្ចប្រជុំ ដើម្បីជ្រើសរើសនាយកប្រតិបត្តិគណបក្ស ជ្រើសរើសបុគ្គលិក ផ្តល់យោបល់អំពីការបោះឆ្នោត៕
