.jpg)
លោកប្រាយុធ (កណ្តាល) ថតជាមួយប្រធានអង្គការបវរកញ្ញាចក្កវាឡ។ AFP
ក្រុងបាងកកៈ សេចក្តីសម្រេចមួយដែលត្រូវបានបោះពុម្ពផ្សាយនៅក្នុងកាសែតភូមិន្ទ បានរាយការណ៍ឲ្យដឹងកាលពីថ្ងៃអង្គារថា របបយោធាថៃបានសម្រេចដកបម្រាមទៅលើសកម្មភាពនយោបាយនៅមុនពេលបោះឆ្នោតនៅឆ្នាំ ២០១៩ រយៈពេលដល់ទៅជាង ៤ ឆ្នាំ បន្ទាប់ពីបម្រាមនោះត្រូវបានប្រកាសក្រោយរដ្ឋប្រហារចុងក្រោយបំផុតនៅក្នុងព្រះរាជាណាចក្រនេះ។
វិធានការមួយនៃវិធានការដំបូងៗ របស់របបយោធាថៃក្រោយពីរដ្ឋប្រហារដណ្តើមអំណាចនៅក្នុងខែឧសភា ឆ្នាំ ២០១៤ គឺត្រូវដាក់ឲ្យសកម្មភាពនយោបាយគ្រប់ប្រភេទទាំងអស់ខុសច្បាប់ ខណៈរបបយោធានេះទប់ស្កាត់មិនឲ្យមានសកម្មភាពប្រឆាំងនៅក្នុងប្រទេសមួយ ដែលល្បីដ៏អាសោច ដោយសារសកម្មភាពនយោបាយតាមដងផ្លូវនានា ប្រកបដោយភាពចម្រូងចម្រាសនិងបណ្តាលឲ្យមនុស្សស្លាប់ច្រើន។
ប៉ុន្តែបម្រាមនោះត្រូវបានដកជាផ្លូវការកាលពីថ្ងៃអង្គារដោយត្រឡប់ទៅរកការបោះឆ្នោតដែលត្រូវបានគ្រោងធ្វើនៅថ្ងៃទី ២៤ ខែកុម្ភៈ ខាងមុខនេះ។
សេចក្តីសម្រេចមួយ ដែលត្រូវបានបោះពុម្ពផ្សាយនៅក្នុងកាសែតភូមិន្ទបានឲ្យដឹងថា ៖ «គ្រប់បក្សនយោបាយ គួរតែធ្វើយុទ្ធនាការឃោសនា ដើម្បីបង្ហាញគោលនយោបាយរបស់ពួកគេចាប់ពីពេលនេះទៅ»។
របបយោនោះ «បានសម្រេចកែប្រែ ឬលុបចោលច្បាប់ទាំងអស់» ដែលអាចរារាំងយុទ្ធនាការឃោសនានៅមុនការបោះឆ្នោតនោះ៕
